አፍንጫ ላይ ተረጭቶ ኮሮናን ለ48 ሰዓታት የሚከላከለው አስደናቂ ፈጠራ

ፈጠራው በቅርቡ ለገበያ ሊቀርብ ይችላል ተብሏል

በእንግሊዝ የበርሚንግሃም ዩኒቨርስቲ ተመራማሪዎች ኮሮናን በቀላሉ ለመከላከል የሚያስችል መላን ስለመዘየዳቸው አስታውቀዋል፡፡

ተመራማሪዎቹ አፍንጫ ላይ ተረጭቶ ኮሮናን እስከ ሁለት ቀናት (48 ሰዓታት) ያህል ለመከላከል ይችላል ያሉትን ፈሳሽ ማዘጋጀታቸውን ነው ያስታወቁት፡፡

ፈሳሹ በእንግሊዝ በቅርቡ ለገበያ ሊቀርብ ይችላል ነው የተባለው፡፡ እስከ መጪው ክረምት በየመድሃኒት መደብሩ ሊቀርብ እንደሚችልም ተነግሯል፡፡

ይህ የሚሆነው የፈሳሹ መቀመሚያ ኬሚካላዊ ግብዓቶች ቀድሞዉኑ በሚመለከታቸው ተቆጣጣሪ አካላት አገልግሎት ላይ መዋል እንደሚችሉ የሚያስረግጥ ፈቃድ በማግኘታቸው ነው፡፡

ይህም በቀላሉ ተመርተው ለገበያ እንዲቀርቡ ከማስቻልም በላይ ማንኛውም ፈላጊ ያለ ሃኪም ትዕዛዝ በማንኛውም ጊዜ እንዲጠቀማቸው ያግዛል፡፡

የምግብ ሳይንስ ባለሙያዎች አዘውትረው ከሚገለገሉባቸው ካራጌናን እና ጌላን ከተባሉ ኬሚካላዊ ግብዓቶች መዘጋጀቱም ነው የተነገረው፡፡

እንደ ዴይሊ ሜይል ዘገባ ከሆነ ተመራማሪዎቹ ከባለፈው ዓመት ወርሃ ሚያዚያ ጀምሮ እስካሁን መጠሪያ ያልተሰጠውን ይህን መድሃኒት ለማዘጋጀት ሲታትሩ ቆይተዋል፡፡

ከሰንደይ ታምስ ጋዜጣ ጋር ቆይታ እንዳደረጉት እንደ መሪ ተመራማሪው ዶ/ር ሪቻርድ ሞክስ ገለጻ ከሆነ በእርሳቸው እና በባልደረቦቻቸው ጥረት የተገኘው አዲሱ ፈጠራ ወረርሽኙን ተከትሎ የተጣሉ ገደቦችን በማቅለል ትምህርት ቤቶችን ጭምር ለመክፈት ያስችላል፡፡

ዴይሊ ሜይል ከአሁን ቀደም እንዳስነበበው ዘገባ ከሆነ ኬሚካሉን በስፋ አምርቶ ጥቅም ላይ ለማዋል ዝግጅቶች በመደረግ ላይ ናቸው፡፡