ፈረንሳይ በቻድ የተቋቋመውን ወታደራዊ የሽግግር መንግስት እንደምትደግፍ አስታወቀች

ፈረንሳይ የፕሬዚዳንትነት ስልጣንን ከአባት ወደ ልጅ ለማስተላለፍ ያደረገችው መፈንቅለ መንግስት ነው- ተቃዋሚ ሀይሎች

የፈረንሳይ የውጭ ጉዳይ ሚኒስቴር በዛሬው እለት እንዳስታወቀው የቻድ ጦር ስልጣኑን መያዙ በሀገሪቱ ሰላምና መረጋጋትን ከመፍጠር አንጻር ተቀባይነት አለው።

የቻድ ፕሬዚዳንት እድሪስ ዴቢይ መገደላቸውን ተከትሎ ልጃቸው ጄነራል ማሃማት እድሪስ ዴቢ የፕሬዚዳንትነት እና የሀገሪቱን ጦር መሪነት ስልጣንን መቆጣጠራቸው ይታወሳል።

በሀገሪቱ ህገ መንግስት ግን ሀገሪቱ ፐሬዚዳንት ከስልጣን በሚነሱበት ጊዜ የሀገሪቱ ብሄራዊ ምክር ቤት አፈ ጉባዔ ጊዜያዊ ፕሬዚዳንት በመሆን ስልጣን እንደሚይዙ ያመላክታል።

ሆኖም ግን የሀገሪቱ ብሄራዊ ምክር ቤት አፈ ጉባዔ ሃሩን ካባዲ በሰጡት መግለጫ ወታደራዊ የሽግግር ምክር ቤት ሀገሪቱን በመምራቱ መስማማታቸውን አስታውቀዋል።

የፈረንሳይ የውጭ ጉዳይ ሚኒስትር ዢያን ያቭሰ ሊ ዳረንም የቻድ ብሄራዊ ምክር ቤት አፈ ጉባዔ ሀሩን ካባዲ የሰጡት መግለጫ ጦሩ ሀገሪቱን እንዲመራ የሚያረጋግጥ ነው ብለዋል።

በሀገሪቱ ህግ መሰረት የፕሬዚዳንትነት ስልጣኑን መያዝ የነበረባቸው የብሄራዊ ምክር ቤት አፈ ጉባዔ ሃሩን ካባዲ ነበሩ ያሉት የፈረንሳይዩ የውጭ ጉዳይ ሚኒስትር፤ በሀገሪቱ ሰላምና መረጋጋትን ለማምጣት ነው የቻድ ጦር በልዩ ሁኔታ ስልጣኑን የያዘው ብለዋል።

የቻድ ተቃዋሚ ሀይሎች የሀገሪቱ ጦር ስልጣኑን መያዙን ተቃወሙ ሲሆን፤ ተግባሩም ፈረንሳይ የፕሬዚዳንትነት ስልጣንን ከአባት ወደ ልጅ ለማስተላለፍ ያደረገችው መፈንቅለ መንግስተ ነው ሲሉም አስታውቀዋል።