እስራኤል በሀማስ ጥቃት አንደኛ አመት እለት ሊቃጣባት የሚችል ጥቃትን ለመከላከል በተጠንቀቅ ላይ ነች

እስራኤል በጋዛ በከፈተችው መጠነሰፊ የአየር እና የእግረኛ ጦር ጥቃት 41825 ፍልስጤማውያን መገደላቸውን የፍልስጤም የጤና ሚኒስቴር መረጃ ያሳያል

እስራኤል በሀማስ ጥቃት አንደኛ አመት እለት ሊቃጣባት የሚችል ጥቃትን ለመከላከል በተጠንቀቅ ላይ ነች።

የፍልስጤሙ ታጣቂ ቡድን ሀማስ ጥቃት በከፈተበት አንደኛ አመት መታሰቢያ እለት ጥቃት ሊከፈትብኝ ይችላል የሚል ስጋት ያደረባት እስራኤል ጥብቅ የደህንነት ዝግጅት እያደረገች ነው።

ይህ የሆነው እስራኤል ኢራን ለፈጸመችባት የሚሳይል ጥቃት ከባድ ምላሽ ለመስጠት ዝግጅት ማጠናቀቋ በተገለጸበት ወቅት ነው።

እስራኤል በደቡባዊ ሊባኖስ በሚገኘው የሄዝቦላ ይዞታ ላይ እያደረሰች ያለውን ጥቃት አጠናክራ ቀጥላለች። የሊባኖስ ብሔራዊ ዜና አገልግሎት እንደገለጸው እስራኤል በዛሬው እለት ጠዋት በቤይሩት ከተማ ደቡባዊ ዳርቻ እና ቾፊያት አካባቢ በሚገኘው የሬዲዮ ጣቢያ ላይ አራት ከፍተኛ ፍንዳታ ያስከተለ የአየር ጥቃት አድርሳለች።

እስራኤል ሀማስ ጥቃት የከፈተበትን አንደኛ አመት ከሊባኖስ በሚተኮሱ ሮኬቶች ምክንያት የእንቅስቃሴ ገደብ በመጣሉ ውስን በሆነ መርሃግብር ታከብረዋለች። የእስራኤል ፕሬዝደንት ኢሳቅ ሄርዞግ የጥቃቱ አንደኛ አመት መታሰቢያ ከመድረሱ ከሁለት ቀናት በፊት "ቁስሉ" አልሻረም ብለዋል።

ፕሬዝደንቱ አክለውም ኢራን እና አጋሮቿ በእስራኤል ላይ "ዘላቂ ስጋት" መደቀናቸውን ተናግረዋል።

ፕሬዝደንቱ በመላው አለም ለሚገኙ አይሁዶች ባለስተላፉት መልእክት "በጥላቻ ታውረው እስራኤልን ለማጥፋት ቆርጠው ተነስተዋል" ያሏቸው ኢራን እና አጋሮቿ ቋሚ የሆነ ስጋት ደቅነዋል ብለዋል።

የእስራኤል የጋዛ ዘመቻ

እስራኤል በትናንትናው እለት ነዋሪዎች በማዕከላዊ ጋዛ ከሚገኙት ኑሴራት እና ቡሬጂ ካምፖች ለቀው እንዲወጡ ትዕዛዝ አስተላልፋለች።  የእስራኤል የጦር ጄቶች በካምፖቹ ውስጥ በዘጠኝ ቦታዎች የሚገኙ ነዋሪዎች በፍጥነት እንዲወጡ እና ወደ ተከለሉት "ሰብአዊ ዞኖች" እንዲሄዱ የሚጠይቅ በራሪ ወረቀቶችን በትነዋል።

እስራኤል ባለፈው አመት ጥቅምት ወር የደረሰባትን ያልተጠበቀ ጥቃት ተከትሎ በጋዛ  በከፈተችው መጠነሰፊ የአየር እና የእግረኛ ጦር ጥቃት 41825 ፍልስጤማውያን መገደላቸውን የፍልስጤም የጤና ሚኒስቴር መረጃ ያሳያል።

ሀማስ በፈመጸው ጥቃት 1200 ሰዎችን የገደለ ሲሆን 1200 የሚሆኑትን ደግሞ አግቶ መውሰዱ ይታወሳል።

እስራኤል በጋዛ  መጠነሰፊ ውድመት ካደረሰች እና በርካታ የሀማስ መሪዎችን ከገደለች በኋላ ትኩረቷን በሊባኖስ ወደሚንቀሳቀሰው ሄዝቦላህ አድርጋለች።