የኢየሱስ ክርስቶስ የትንሳኤ በዓል (ፋሲካ)ን ከኢትዮጵያ ጋር የሚያከብሩ ሀገራት የትኞቹ ናቸው?

የጎርጎሮሳውያኑን የዘመን ቀመር የሚከተሉ ሀገራት ክርስቲያኖች ፋሲካን ከወር በፊት ማክበራቸው ይታወሳል

የኢየሱስ ክርስቶስ ትንሳዔ (ፋሲካ) በምስራቅ ኦርቶዶክስ ቤተክርስቲያን አማኞች (ኦሪዬንታል ኦርቶዶክስ) ዘንድ በዛሬው እለት እየተከበረ ነው።

በክርስትና እምነት ተከታዮች ተከታዮች ከሚከበሩት አበይት በዓላት መካከል የኢየሱስ ክርስቶስ የትንሳዔ (ፋሲካ) በዓል አንዱ ነው።

ኢትዮጵያን ጨምሮ የጁሊያን የዘመን ቀመር የሚከተሉት ሀገራት ናቸው በተለያዩ ሃይማኖታዊ እና ባህላዊ ስነስርአቶች በዓሉን እያከበሩ የሚገኙት።

ከአለማችን ህዝብ 12 ከመቶው የኦርቶዶክስ ክርስቲያን መሆኑን ታይም መጽሄት ያወጣው መረጃ ያመላክታል።

እስከ 300 ሚሊየን የሚደርሱ ሰዎች የኦርቶዶክስ ክርስትና እምነትን እንደሚከተሉም ነው ግምቱን ያስቀመጠው።

በምስራቅ አውሮፓ፣ መከከለኛው ምስራቅና በአፍሪካ ኢትዮጵያ እና ግብጽ ከፍተኛ የእምነቱ ተከታዮች ቁጥር ይገኝባቸዋል።

የዘመን ቀመሯን ከኢየሱስ ክርስቶስ ልደት ጋር ያዋደደችው ኢትዮጵያ የ2016 የትንሳዔ (ፋሲካ) በዓልን በዛሬው እለት እያከበረች ትገኛለች።

ከ15 ሚሊየን በላይ የግብጽ ኮፕቲክ ኦርቶዶክስ አማኞችም የኢየሱስ ክርስቶስ ትንሳዔ (ፋሲካ) በዓልን በዛሬው እለት እያከበሩት ነው።

የሩሲያ ኦርቶዶክስ እምነት ተከታዮችም የኢየሱስ ክርስቶስ ትንሳዔ (ፋሲካ) በዓልን በዛሬው እለት በማክበር ላይ ናቸው።

የኦርቶዶክስ ቤተክርስቲያናት በሚገኙባቸው ኤርትራ፣ እስራኤል፣ አርመኒያ፣ ሰርቢያ፣ ቤላሩስ፣ ሞንቴኔግሮ፣ ቡልጋሪያ፣ መቄዶኒያ፣ ጆርጂያ እና ሞልዶቫም የኢየሱስ ክርስቶስ ትንሳዔ (ፋሲካ) በዓል በዛሬው እለት እየተከበረ ነው።