ማረከስ ራሽፎርድ ለ6 ሳምንታት ከሜዳ ይርቃል ተባለ
የማንቺስተር ዩናይትድ አጥቂ ማርከስ ራሽፎርድ በመለስተኛ የጀርባ አጥንት ስብራት ምክኒያት ለ 6 ሳምንታት ከሜዳ እንደሚርቅ አሰልጣኙ አረጋግጠዋል፡፡
ማንቺስተር በኤፍኤ ካፕ ውድድር ባለፈው ረቡዕ ከዎልቭስ ጋር በነበረው ጨዋታ ራሽፎርድ በ64ኛው ደቂቃ ተቀይሮ ገብቶ ከ15 ደቂቃ በኋላ ነበር ተጎድቶ ከሜዳ የወጣው፡፡
ትናንት ራሽፎርድ ባልተሰለፈበት ጨዋታ ሊቨርፑል በሜዳው ማንቺስተርን 2 ለ 0 አሸንፏል፡፡
በቀጣይ ጨዋታዎች ስለተጫዋቹ ምትክ የተጠየቁት የክለቡ አሰልጣኝ ኦሌ ጋናር ሶልሻይር፣ ማንቺስተር በውድድር ዓመቱ በርካታ ታላላቅ ተጫዋቾቹ በጉዳት ላይ እንደሚገኙ ጠቅሰው፣ ዓመቱ ለክለቡ እጅግ አስቸጋሪ የፈተና ዓመት መሆኑን ተናግረዋል፡፡
እስከውድድር ዓመቱ ማብቂያ ክለቡን ሊታደጉ የሚችሉ የአጭር ጊዜ ተጫዋቾችን ለማስፈረም ጥረት እንደሚያደርጉም ሶልሻይር ገልጸዋል፡፡
ራሽፎርድ በውድድር ዓመቱ እስካሁን ለሀገሩና ለክለቡ 22 ጎሎችን ያስቆጠረ ሲሆን ከዚህም 14ቱ በፕሪሚየር ሊግ ያስቆጠራቸው ናቸው፡፡
ምንጭ፡- ቢቢሲ
