ሮናልዶ ጎሎችን አስቆጥሮ የአል ናስር 68ኛ የምስረታ በዓልን ሲያደምቅ

ሮናልዶ ለአል ናስር ያስቆጠራቸው ጎሎች 20 ደርሰዋል

ፖርቹጋላዊው ኮከብ ሮናልዶ ጎሎች በማስቆጠር ለአል ናስር 68ኛ አመት የእንኳን አደረሳችሁ መልዕክቱን አስተላልፏል።

አል ናስር በእስያ ሻምፒዮንስ ሊግ የኳታሩን አል ዱሄል 4 ለ 3 በሆነ ውጤት አሸንፏል።

በጨዋታው ሁለት ጎሎችን ያስቆጠረው እና አንድ ጎል የሆነ ኳስ ያቀበለው ሮናልዶ ከድሉ በኋላ በኤክስ (ትዊተር) ገጹ ላይ ለአል ናስር ደጋፊዎች የደስታ መልዕክቱን አጋርቷል።

“በሪያድ ድንቅ ምሽት አሳልፈናል፤ በሶስት ጨዋታ ሶስት ድል አስመዝግበናል፤ እንኳን ለአል ናስር 68ኛ አመት የምስረታ በዓል አደረሳችሁ” ብሏል ሮናልዶ።

ሮናልዶ አል ናስርን ከተቀላቀለ በኋላ በተሰለፈባቸው 19 ጨዋታዎች 20 ጎሎችን ማስቆጠር ችሏል።

አል ናስር በአሁኑ ወቅት በሳኡዲ ፕሮ ሊግ ሶስተኛ ደረጃን የያዘ ሲሆን በእስያ ሻምፒዮንስ ሊግም ምድቡን እየመራ ነው።