የዋጋ ጭማሪው ከመጭው ጥር ወር ጀምሮ የተገበራል ተብሏል
ግብጽ በስዊዝ ካናል ላይ የ15 በመቶ የክፍያ ጭማሪ ማድረጓን አስታወቀች።
ሰሜን አፍሪካዊቷ ግብጽ ከቀጣዩ ጥር ወር ጀምሮ በስዊዝ ካናል በሚያልፉ መርከቦች ላይ የዋጋ ጭማሪ ማድረጓን አስታውቃለች።
ሮይተርስ የስዊዝ ካናል ሊቀመንበርን ዋቢ አድርጎ እንደዘገበው ከሆነ ግብጽ በእቃ ጫኝ መርከቦች ላይ የ15 በመቶ በትራንዚት እና በጎብኚዎች መርከቦች ላይ ደግሞ የ10 በመቶ የአገልግሎት ክፍያ ተጨምሯል።
የግብጽ ዋነኛ የገቢ ምንጭ የሆነው የስዊዝ ካናል በፈረንጆቹ 1869 ዓመት ጀምሮ ለአገልግሎት ክፍት የሆነ ሲሆን ይህ የመርከቦች መጓጓዣ መስመር በቀን 50 መርከቦችን በማጓጓዝ ላይ ይገኛል።
ስዊዝ ካናል አገልግሎት መስጠት ከጀመረ 153 ዓመት የሞላው ሲሆን ግብጽ ከስዊዝ ካናል ባለፉት 12 ወራት ውስጥ ሰባት ቢሊዮን ዶላር ገቢ ማግኘቷን ገልጻለች።
ስዊዝ ካናል ከ153 ዓመት በፊት ሜድትራኒያን ባህርን እና ህንድ ውቂያኖስን በማገኛኘት በአውሮፓ እና እስያ መካከል የሚደረገውን የባህር ላይ ጉዞ በማሳጠር ዘመናዊ የባህር ትራንስፖርት ያቀላጥፋል፡፡
በወቅቱ የግብጽ መሪ የነበሩት ካዲቭ እስማኤል ፓሻ ተመርቆ አገልግሎት መስጠት የጀመረው ይህ የመርከቦች መተላለፊያ መስመር ግንባታው 10 ዓመታትን ፈጅቷል።
በዓመት 300 ሚሊዮን ቶን እቃዎች የሚተላለፉበት ስዊዝ ካናል የአገልግሎት መጠኑን ለማስፋት ግብጽ በየጊዜው የተለያዩ ማሻሻያዎችን አድርጋለች።
የአሁኑ የግብጽ ፕሬዝዳንት አልሲሲ በፈረንጆቹ 2014 ላይ በስዊዝ ካናል ላይ የተደረገውን የ8 ቢሊዮን ዶላር የማስፋፋያ ግንባታ መመረቃቸው አይዘነጋም።
ስዊዝ ካናል በተሰራለት የማስፋፊያ ግንባታ መሰረት አሁን ላይ ስፋቱ 61 ሜትር በ312 ሜትር ላይ የደረሰ ሲሆን ከአንድ ዓመት በፊት ከቻይና የመጣ ኮንቴይነሮችን የጫነች እቃ ጫኝ መርከብ መተላለፊያ መስመሩን ለአንድ ወር ዘግታ የ100 መርከቦችን እንቅስቃሴ በመግታት የዓለምን ንግድ ማስተጓጎሏ ይታወሳል።
