ከአንድሮይድ ስልኮች በፍጥነት መጥፋት ያለባቸው መተግበሪያዎች

መተግበሪያዎቹ የባንክ አካውንት፣ የይለፍ ቃላት፣ የኢሜል መልዕክቶች እና ሌሎች ሚስጢራዊ መረጃዎችን ይመነትፋሉ ተብሏል

አንድሮይድ መተግበሪያዎችን እንዳሻን መጫን የሚያስችል ሶፍትዌር መሆኑ ለመረጃ መንታፊዎች የማጋለጥ እድሉ ከፍተኛ ነው።

የሳይበር ጥቃት ፈጻሚዎች በፕሌይ ስቶር የተጫኑ መተግበሪያዎችን አውርደው ቫይረስ ከጫኑባቸው በኋላ በሌላ ስም ፕሌይ ስቶር ላይ ይጭኗቸዋል።

ለተለያየ አገልግሎት ይውላሉ በሚል ወይንም በድንገት የሚያወርዷቸው ሰዎችም በርካታ መረጃዎችን የያዙት ስልኮቻቸው በመረጃ ጠላፊዎቹ እጅ ይገባል።

• የስማርት ስልኮቻችንን ደህንነት በምን መልኩ ማስጠበቅ እንችላለን?

በመተግበሪያዎች (አፕሊኬሽን) ውስጥ የሚገኙ ቫይረሶች በሶስት የሚመደቡ ናቸው።

“Harly Trojan”፣ “Joker” እና “Autolycos” ይሰኛሉ።

“Harly Trojan” በዋናነት በክፍያ አገልግሎት የሚሰጡ መስለውና የክሬዲት ካርድ ቁጥር ጠይቀው የባንክ አካውንታችን ባዶ የሚያስቀሩ ናቸው፡፡

“Joker” ደግሞ የሚጠለፈውን ሰው የስልክ ቁጥር ዝርዝር፣ አጭር የጽሁፍ መልዕክቶችና ጠቅላላ የስማርት ስልኩን ባለቤት መረጃዎች ይሰበስባል፤ ያለባለቤቱ እውቅናም በገንዘብ የሚቀርቡ አገልግሎቶች ላይ አስመዝግቦ ወደ ጠላፊዎቹ ኪስ ያስገባል።

• ፓስወርድን በሚገባ ጠብቀው የሚያስቀምጡ 10 መተግበሪያዎች

በ2021 በሺዎች የሚቆጠሩ አንድሮይድ ስማርት ስልኮችን ያጠቃው “Autolycos”ም ከታች በተዘረዘሩት መተግበሪያዎች (ከ14 - 19) በኩል የግለሰቦችን መረጃና ሚስጢራዊ ሰነዶች መመንተፉ ተነግሯል።

አንድሮይድ ስማርት ስልክ የምትጠቀሙ ሰዎች እነዚህን 19 አደገኛ መተግበሪያዎች ባለማወቅ ከጫናችኋቸው በፍጥነት አጥፏቸው ብሏል ማልዌርፎክስ የተሰኘው የቴክኖሎጂ ኩባንያ።

1. Fare Gamehub and Box

2. Hope Camera-Picture Record

3. Same Launcher and Live Wallpaper

4. Amazing Wallpaper

5. Cool Emoji Editor and Sticker

6. Simple Note Scanner 

7. Universal PDF Scanner 

8. Private Messenger 

9. Premium SMS 

10. Blood Pressure Checker 

11. Cool Keyboard 

12. Paint Art

13. Color Message

14. Vlog Star Video Editor

15. Creative 3D Launcher

16. Wow Beauty Camera

17. Gif Emoji Keyboard

18. Instant Heart Rate Anytime

19. Delicate Messenger

ጎግል ከፕሌይ ስቶር ላይ አንዳንዶቹን አደገኛ መተግበሪያዎች ቢያጠፋቸውም ስማቸውን በመጠኑ እየቀየሩ የሚሊየኖችን ደህንነት አደጋ ላይ የጣሉ በርካታ መተግበሪያዎች እንዳሉ ይነገራል።

እናም ከላይ የተዘረዘሩትን ጨምሮ የሚያጠራጥሩንና ተጠቅመንባቸው የማናውቀውን መተግበሪያዎች ማጥፋት ተገቢ ነው።

ፕሌይ ስቶር ላይ የትኛውንም መተግበሪያ ከመጫናችን በፊትም ሰዎች ለመተግበሪያዎቹ የሰጡትን ደረጃና አስተያየት በደንብ መመልከት ያስፈልጋል ይላል ማልዌርፎክስ።

ስልካችን የመንቀራፈፍ፣ የመጥፋት፣ ባትሪ የመጨረስና ሌሎች ያልተለመዱ ነገሮችን ካየንበት ምናልባት በቫይረስ ተጠቅቶ ሊሆን ስለሚችል በፍጥነት አፕዴት ማድረግና አጠራጣሪ መተግበሪያዎችን ማጥፋት እንደሚገባ አሳስቧል።

ማልዌርፎክስከፕሌይ ስቶር ውጭ መተግበሪያዎችን መጫን ይበልጥ አደገኛ መሆኑንም ገልጿል።