በመጣላት ላይ እያሉ ከሁለተኛ ፎቅ ላይ የወደቁት ፍቅረኛሞች

ጥንዶቹ የአካል ጉዳት የደረሰባቸው ሲሆን ህክምና እየተከታተሉ ነው

የሩሲያዋ ሴንት ፒተርስበርግ ከተማ ነዋሪ የሆኑት ፍቅረኛሞች በመጣላት ላይ እያሉ ከሁለተኛ ፎቅ ላይ ተያይዘው መውደቃቸው ተሰምቷል።

ፍቅረኛሞቹ በቤታቸው በረንዳ ላይ ሆነው በመጣላት ላይ እያሉ ተያይዘው ወደ መሬት መውደቃቸውን ዴይሊ ሜይል ዘግቧል።

በሁለቱ ፍቅረኛሞች መካከል የነበረው አለመግባባት ወደ ግብግብ ከተለወጠ በኋላ የበረንዳቸው መከለያ አጥር ተደረምሶ ተያይዘው ወድቀዋል።

ፍቅረኛሞቹ ሁለተኛ ፎቅ ላይ ከሚገኘው መኖሪያ ቤታቸው በረንዳ ላይ ተያይዘው ሲወድቁ የሚያሳዩ ፎቶ ግራፎችም በብዛት ተለቀዋል።

ፍቅረኛሞቹ ከህንጻው ላይ ሲወድቁ የሚያሳየውን ምስል ፣ ድንገት በቤታቸው በኩል ሲያልፍ የነበረ መንገደኛ እንዳነሳውም ተነግሯል።

ግለሰቡ እንዴት ሊያነሳው እንደቻለ ሲጠየቅ “የሁለቱ ፍቅረኛሞች ጠብ ቀልቤን ሳበው፤ በዚያ ጊዜም ስልኬን አውጥቼ መቅረጽ ጀመርኩኝ፤ በዚህም ሁለቱም ተያየዘው ሲወድቁ ፎቶ ላነሳቸው ቻልኩ” ብሏል።

ሁለቱ ፍቅረኛሞች ከህንጻው ላይ ተያይዘው ከወደቁ በኋላ በአካላቸው ላይ ጉዳት ደርሶባቸው ወደ ሆስፒታል የተወሰዱ ሲሆን፤ ጉዳቱ ከባድ ቢሆንም ለህይወታቸው እንደማያሰጋ ታውቋል።

የአካባቢው ባለስልጣናትም ፣ ጥንዶቹ አሁን ላይ ህክምና እየተከታተሉ መሆኑን አስታውቀዋል።