በምድር ላይ የሚከሰቱ ወረርሽኞችን ቀድሞ ለመተንበይ ጥቅም ላይ እየዋለ የሚገኘው ሰው ሰራሽ አስተውሎት

አዳዲሶቹ ሰው ሰራሽ አስተውሎቶች ወረርሽኝ የሚከሰትበትን እድል ከመተንበይ አንስቶ ክትባት እስከ ማምረት ሊያግዙ የሚችሉ ናቸው

የዘመኑ ቴክኖሎጂ ውጤት መዳረሻ የሆነው ሰው ሰራሽ አስተውሎት በተለያዩ ዘርፎች ውስጥ እየገባ ጥቅም እየሰጠ ይገኛል፡፡

ኤሌክትሮኒክስ ፣ ህክምና ፣ ወታደራዊ መሳርያዎች ፣ ሙዚቃ እና ትምህርት ሰው ሰራሽ አስተውሎት (ኤአይ) በሰፊው እያገለገለ ከሚገኝባቸው ዘርፎች መካከል ይጠቀሳሉ፡፡

ምድርን በተደጋጋሚ የሚጎበኟት የተለያዩ ወረርሽኞች ከ100ሺዎች እስከ ሚሊየኖች የሚቆጠሩ የሰው ልጆችን ህይወት እየነጠቁ ይገኛሉ፡፡ 

የሰው ልጅ አሁን በሚገኝበት የቴክኖሎጂ ደረጃ ለወረርሽኞች ቀደም ብሎ ክትባት እና መድሀኒቶችን እንዲፈጥር ይጠበቃል፡፡

 የአየር ንብረት ለውጥ የፈጠረው ተጽእኖ ለክትባት የሚሆኑ እጽዋቶችን በማመናመኑ መደሀኒት እና ክትባቶችን በቀላሉ ማምረት አልተቻለም፡፡  

በመጪዎቹ አስርተ አመታት በኮሮና ቫይረስ ልክ ገዳይ የሆነ ወረርሽኝ ምድርን ሊያጋጥማት እንደሚችል ተመራማሪዎቹ ተንብየዋል፡፡ 

ይህ ወረርሽን ኢንፍሎይንዛ ፣ ኮሮና ቫይረስ ወይም አዲስ የማይታወቅ ወረርሽኝ ሊሆን እንደሚችል ይጠበቃል፡፡

በአሁኑ ወቅት በአርቲፊሻል እንተለጄንስ በመታገዝ በተለያዩ ቦታዎች የወረርሽኞችን ተጽእኖ ለመከላከል የሚያስችሉ ሙከራዎች በሰፊው በመከናወን ላይ ይገኛሉ፡፡

 ቢቢሲ ሰው ሰራሽ አስተውሎት መጪውን ወረርሽኝ ለመከላከል ምን ያህል ሊያግዝ ይችላል በሚል ባስነበበው ጽሁፍ ሶስት የተለያዩ ሰው ሰራሽ አስተውሎቶችን ዳሷል፡፡

የካሊፎርኒያ እና ሎስአንጀለስ ዩኒቨርሲቲዮች በጋራ ያበለጸጉት ኤ አይ ቀዳሚው ሲሆን ይህ ሰው ሰራሽ አስተውሎት የማህበራዊ ትስስር ገጾችን በመከታተል በተደጋጋሚ ሰዎች የሚያጋሯቸውን የበሽታ ምልክቶች እና ልምድ በመከታተል ቀደም ብሎ ማስጠንቀቂያ የሚሰጥ ነው፡፡

ተመራማሪዎቹ ይህ ሰው ሰራሽ አስተውሎት የወደፊቱን ወረርሽኞች ለመለየት ፣ ለመተንበይ ፣ ለመከታተል እና የሚያስከትለውን ተፅእኖ ለመቀነስ ከፍተኛ ሚና ይኖረዋል ብለዋል።

ከ2015 እስከ አሁን ድረስ ያሉ ከተለያዩ የአለም ክፍሎች የተሰበሰቡ 2.3 ቢሊየን የትዊተር ልጥፎችን በአሁኑ ወቅት የሰው ሰራሽ አስተውሎቱ በማጣራት ላይ ይገኛል ነው የተባለው፡፡ 

ከወረርሽኝ ጋር በተያያዘ አገልግሎት እየሰጠ የሚገኝው ሁለተኛው ሰው ሰራሽ አስተውሎት በሃርቫርድ እና ኦክስፎርድ ዩኒቨርስቲ ትብበር የተሰራው ነው፡፡ 

ይህኛው ሰው ሰራሽ አስተውሎት ደግሞ የኮቪድ 19 ልውጥ ቫይረሶችን እንቅስቃሴ በማጥናት የስጋት መጠናቸውን በየሳምንቱ ሪፖርት የሚያቀርብ ነው ተብሏል፡፡ 

ከዚህ በተጨማሪም የኤችአይቪ እና የኢንፍሉዌንዛ ቫየረስ እንቅስቃሴዎችን እንዲሁም የቫይረሱን የእድገት መጠን ለመተንበይ ጥቅም ላይ እየዋለ ነው፡፡ 

ሰው ሰራሽ አስተውሎቱ ቫይረሶቹ እንደሚያሳዩት የባህሪ ለውጥ ቀደም ብሎ ክትባቶች እንዲዘጋጁ እና በሽታው ወደ ወረርሽ ከመቀየሩ በፊት በፍጥነት ለመቆጣጠር ከፍተኛ ሚና እንዳለው ነው የተነገረው፡፡

ሶስተኛው እና የመጨረሻው በግዙፉ ክትባት አምራች አስትራዚንካ አገልግሎት እየሰጠ የሚገኝው አርቲፊሻል ኢንተለጄንስ ነው፡፡

ይህ ኤ አይ የአየር ጸባይ ለውጦችን እና የሰውነት የጤና ስርአትን በመከታተል፣ የሰውነት በሽታ የመከላከል ስርዓትን በማጎልበት ጎጂ የሆኑ ንጥረ ነገሮችን ለመዋጋት የሚያገለግሉ ፕሮቲኖች ለመስራት እና አዳዲስ ክትባቶችን ለማበልጸግ ጥቅም ላይ ሊውል ይችላል ተብሏል፡፡