ኔይማር እና የሳኡዲው አል-ሂላል በስምምነት ተለያዩ

ብራዚላዊው አጥቂ ከሳኡዲ ስንብት በኋላ ወደ ልጅነት ክለቡ ሳንቶስ ሊመለስ እንደሚችል ተነግሯል

ኔይማር እና አል ሂላል የተጫዋቹን ውል በጋራ ስምምነት ለማቋረጥ ውሳኔ ላይ መድረሳቸው ተገለጸ፡፡

ክለቡ ከስምምነት ማቋረጡ በኋላ ባወጣው መግለጫ ኔይማር በእግር ኳስ ህይወቱ እና በክለቡ በነበረው ቆይታ ላደረገው አስተዋጽኦ ምስጋናውን ገልጿል፡፡

ከክርስቲያኖ ሮናልዶ እና ከካሪም ቤንዜማ በኋላ ወደ ሳውዲ ሊግ ያቀናው ትልቁ የእግር ኳስ ኮከብ ኔይማር ለአል ሂላል ባደረጋቸው ጨዋታዎች አንድ ጎል እና ሁለት ለጎል የሚሆኑ ኳሶችን አመቻችቶ ማቀበል ችሏል።

የ32 አመቱ ተጫዋች በነሀሴ 2023 በ98.5 ሚሊየን ዶላር የሳውዲውን ክለብ የተቀላቀለ ቢሆንም በተደጋጋሚ ባጋጠመው ጉዳት ምክንያት ለክለቡ መሰለፍ የቻለው በሰባት ጨዋታዎች ላይ ብቻ ነበር፡፡

ቡድኑን ከተቀላቀለ በኋላ በጥቅምት 2023 በጅማቱ ላይ ባጋጠመው ጉዳት እስከ 2024 ጥቅምት ወር ድረስ ለአንድ አመት ከሜዳ ርቆ የቆየ ሲሆን ቀጥሎም ወደ ሜዳ ተመልሶ ሁለት ጨዋታዎችን ካደረገ በኋላ እስካለፈው ህዳር ወር ድረስ በጉዳት ላይ ቆይቷል፡፡

በ2017 በ 263 ሚሊዮን ዶላር ወደ ፔኤስጂ ከተዘዋወረ በኋላ አሁንም የዓለማችን ውድ ተጫዋች የሆነው ብራዚላዊው አጥቂ ወደ ልጅነት ክለቡ ሳንቶስ እንደሚመለስ በሰፊው እየተዘገበ ይገኛል፡፡

በፈረንሳይ ኔይማር 5 የሊግ ዋንጫዎችን ከፒኤስጂ ጋር ቢያነሳም ክለቡ የቻምፒየንስ ሊግ ዋንጫን የማሸነፍ የመጨረሻ ግቡ ላይ እንዲደርስ ማገዝ አልቻለም።

የሴሌሳኦ የምንግዜም መሪ ጎል አግቢ የሆነው ኔይማር በ2013 ሳንቶስን ለቆ ባርሴሎናን ሲቀላቀል ከብራዚል ከወጡ ተስፋ የተጣለባቸው ወጣት እግር ኳስ ተጫዋቾች መካከል አንዱ ነበር፡፡

በባርሳ በነበረው ቆይታ ወርቃማ ጊዜን ያሳለፈው ኔይማር የሻምፒዮንስ ሊግ እና ሁለት የላሊጋ ዋንጫዎችን በማሸነፍ ከሊዮኔል ሜሲ እና ሉዊስ ሱዋሬዝ ጋር የተዋጣለት ጥምረት ፈጥረው ለእግር ኳስ አፍቃሪያን አሳይተዋል፡፡

ብራዚላዊው ኮከብ ኔይማር ጁኒየር በአጠቃላይ በ717 ጨዋታዎች ላይ ተሰልፎ 439 ግቦችን ሲያስቆጥር 279 ለግብ የሚሆኑ ኳሶችን አመቻችቶ ማቀበል ችሏል፡፡

የኔያማር ወደ ሳንቶስ መመለስ በብራዚል ሚዲያ ውስጥ በሰፊው እየተዘገበ ሲሆን በዚህ ሳምንት መጀመሪያ ላይ ስምምነቱ ሊጠናቀቅ ይችላል ተብሏል፡፡

 ሳንቶስ በብራዚል ሊግ በ2024 ከሴሪ ቢ ወደ ሴሪ ኤ የብራዚል ከፍተኛ ዲቪዚዮን ተመልሷል።