መንግስት የመገናኛ ብዙኃን ባለሙያዎችን እስር እና እንግልት እንዲያቆም ተጠየቀ

የኢትዮጵያ ብዙሀን መገናኛ ባለሙያዎች ማህበር ጋዜጠኞች ላልተገባ እስር እና እንግልት መዳረጋቸውን አስታውቋል

የኢትዮጵያ መገናኛ ብዙሃን ባለሙያዎች ማህበር መንግስት የመገናኛ ብዙኃን ባለሙያዎችን እስር እና እንግልት እንዲያቆም ጠይቋል።

የኢትዮጵያ ብዙሀን መገናኛ ባለሙያዎች ማህበር በጋዜጠኞች እስር ዙሪያ መግለጫ አውጥቷል።

• ፕሬዝደንቱን የሚያሳይ ያልተገባ ቪዲዮ ለቀዋል የተባሉት የደቡብ ሱዳን ጋዜጠኞች ታሰሩ
• ባለፉት 20 ዓመታት 2 ሽህ የሚጠጉ ጋዜጠኞች ተገድለዋል ተባለ

ማህበሩ እንዳለው የብዙሀን መገናኛ ባለሙያዎች ስህተት በሚሰሩበት ወቅት ደግሞ በህግ አግባብ መጠየቅ እንዳለባቸው እና የህግ የበላይነት መከበር እንዳለበት እንደሚያምን ገልጿል። 

ይሁን እንጅ "ከለውጡ በኋላ" በሀገራችን የመገናኛ ብዙኃን ነፃነት እንዲረጋገጥ ማህበራችን ብዙ ተስፋ አድርጎ የነበረ ቢሆንም ከጊዜ ወደ ጊዜ ባለሙያዎች የሚሰሩበት አውድ እየጠበበ ጋዜጠኞች ስራቸውን በነፃነት እንዳይሰሩ በመንግስት የፀጥታ አካላት እየተሸማቀቁ እና እንግልት እየደረሰባቸው መሆኑን ማህበሩ በመግለጫው ላይ ገልጿል።

የመገናኛ ብዙኃን ባለሙያዎች ማህበር መስራችና የስራ አስፈፃሚ አባል እንዲሁም የማህበሩ የህዝብ ግንኙነት ክፍል ኃላፊ ጋዜጠኛ ዳዊት በጋሻውን ጨምሮ አራጋው ሲሳይ ፣ ገነት አስማማው ፣ ጌትነት አሻግሬ ፣ በየነ ወልዴና ቴዎድሮስ አስፋው በመንግስት ሀይሎች በቁጥጥር ስር ውለዋልም ብሏል። 

ከታሰሩት ጋዜጠኞች ውስጥ የተወሰኑት ያሉበት ቦታ እና ምን ሁኔታ ላይ እንዳሉ እንኳን ቤተሰቦቻቸውም በቂ መረጃ የላቸውም ብሏል ማህበሩ። 

ጋዜጠኞች ያለ ፍርድ ቤት ማዘዣ እየታሰሩ፣ እየታፈኑና ቤታቸውና ቢሯቸው እየተበረበረ መሆኑ ባለሞያዎች ስራቸውን በነፃነት እንዳይሰሩ፤ የፕረስ ምህዳሩ የበለጠ እንዲጠብ ማድረጉንም ማህበሩ ገልጿል።

ማህበራችንም የተቋቋመው እንደዚህ አይነት ሙያውን የሚያቀጭጩ ጫናዎችን ለመታገል በመሆኑ እርምጃዎችን በፅኑ አወግዛለሁም ብሏል። 

ጋዜጠኞች በወንጀል ሲጠረጠሩ ጉዳያቸውን እስር ቤት ሳይቆዩ መከታተል እንደሚችሉ ከሁለት ዓመት በፊት በወጣው በመገናኛ ብዙኃን አዋጅ ቢደነገግም ተግባራዊ አለመደረጉ ማህበሩን እንዳሳበበውም አስታውቋል።

መንግስት የፕረስ ነፃነት እንዲረጋገጥ ያጸደቃቸውን ህገ-መንግስታዊና ዓለም አቀፋዊ ህጎች እንዲያከብርና ውስጡን እንዲፈትሽ እንዲሁም ያለምንም የህግ አግባብ ያሰራቸውን የመገናኛ ብዙኃን ባለሙያዎች በአስቸኳይ እንዲፈታ እና ባለሙያዎች ላይ የሚያደርሰውን ማሸማቀቅ እንዲያቆም ማህበሩ ጠይቋል። 

ዓለም አቀፉ የጋዜጠኞች ጥበቃ ተቋም ወይም ሲፒጂ ኢትዮጵያ ጋዜጠኞችን እያሰረች መሆኑን እና የታሰሩ ጋዜጠኞች ከእስር እንዲፈቱ መጠየቁ ይታወቃል።