የቻይና ተመራማሪዎች በጨረቃ ላይ መኖርያ ቤት ለመገንባት የሚያስችል ጡብ እያመረቱ ነው

ጡቦቹ በምድር ላይ ጥቅም ላይ ከሚውሉት ቀይ ጡቦች እና የግንባታ ብሎኬቶች ሶስት እጥፍ ጥንካሬ አላቸው

ቻይና በጨረቃ ላይ መኖርያ ቤቶችን ለመገንባት የሚያስችሉ “ሉናር ብሪክስ” የሚል ስያሜ የተሰጣቸውን ጡቦች በማምረት ላይ እንደምትገኝ ተነገረ፡፡

የሀገሪቱ ተመራማሪዎች በቅርብ ጊዜ ውስጥ በዓለም ላይ የመጀመሪያውን የምርምር ጣብያ እና መኖሪያ ቤቶችን ለመገንባት የሚያገለግሉ የጨረቃ አፈርን ጨምሮ የተለያዩ ቴክኖሎጂን የተላበሱ ጡቦችን እየሰራን ነው ብለዋል፡፡

ጨረቃን ለመቆጣጠር እና አዳዲስ ግኝቶችን ለማስተዋወቅ አለምአቀፋዊ ፉክክር ውስጥ ከፊት ከሚጠቀሱ ሀገራት መካከል ቤጂንግ አንዷ ስለመሆኗ ሚስጥር አይደለም፡፡

በዚህ አመት መጀመሪያ ላይም ከዚህ ቀደም ተደርሶበት በማይታወቅ በጨረቃ የጨለማ ክፍል ላይ መንኮራኩሯን በማሳረፍ ጠቃሚ የአፈር ናሙናዎችን ወደ ምድር ይዛ በመምጣት የመጀመሪያዋ ሀገር ሆናለች።

ሰዎችን ጨረቃ ላይ ማሰረፍ እና ለረጅም ጊዜ ማቆየት ደግሞ ቀጣዩ እቅዷ ይመስላል።

በዚህም አካላዊ ግፊት እና ከጸሀይ የሚመጣን ከፍተኛ ጨረር መቋቋም ይችላል የተባለው “ሉናር ሶይል ብሪክስ” የሚል ስያሜ የተሰጠው ጡብ በ2025 ወደ ጨረቃ ተልኮ እስከ አመቱ መጨረሻ ሙከራ እንደሚደረግበት ተገልጿል፡፡

በሙከራ ጊዜው ጨረቃ ከፍተኛ መጠን ያለው የጠፈር ጨረሮች (ኮስሚክ ራድየሽን) ስላላት ተመራማሪዎች ጡቦች በጨረቃ ላይ የሚገኝውን ጨረር ምን ያህል መቋቋም እንደሚችሉ ማረጋገጥ ይፈልጋሉ፡፡

• ሩሲያ ከቻይና ጋር በመሆን በጨረቃ ላይ የኑክሌር ኃይል ጣቢያ ለማቋቋም ማቀዷን ገለጸች

ሉናር ብሪክስ ጡቦች በሁዝሆንግ የሳይንስ እና ቴክኖሎጂ ዩኒቨርስቲ በብሔራዊ ዲጂታል ኮንስትራክሽን ክፍል የተሰሩ መሆናቸው ነው የተነገረው፡፡

በቀላሉ ለመገጣጠም ምቹ እንደሆኑ የተነገራለችው ጡቦች ከጨረቃ አፈር ጋር ለመዋሀድ እና ጠንካራ ሆኖ ለመቆም የተለያዩ ውህዶችን በውስጣቸው እንደያዙ ተሰምቷል፡፡

ጡቦቹ በምድር ላይ ጥቅም ላይ ከሚውሉት ቀይ ጡቦች እና የግንባታ ብሎኬቶች ሶስት እጥፍ ጥንካሬ ያላቸው ሲሆን ይህም በአንድ ካሬ ውስጥ ከአንድ ቶን በላይ ክብደትን መቋቋም የሚያስችላቸው ነው ተብሏል፡፡

የዓለማችን የመጀመሪያ የጨረቃ አፈር ጡቦች በቲያንዙ-8 የጭነት መንኮራኩር በቀጣዩ አመት ወደ ቻይና የጠፈር ጣቢያ ይላካሉ።

 የቻይና ሳይንቲስቶች አዲሶቹ ጡቦች በጨረቃ ላይ ለሚከናወኑ ግንባታዎች ተስማሚ መሆናቸውን ለማወቅ እስከሚቀጥለው ዓመት መጨረሻ ድረስ ምርምራቸውን እንደሚቀጥሉ ሬውተርስ  ዘግቧል።