የሰብዓዊ ድጋፎች ማከፋፈያ ማእከል በአዲስ አበባ ተከፈተ

በዓለም የምግብ ፕሮግራም እና በኢትዮጵያ ትብብር የተከፈተው የኮሮና ቫይረስ አቅርቦቶች ማእከል ስራ ጀመረ

በዓለም የምግብ ፕሮግራም እና በኢትዮጵያ ትብብር የተከፈተው የኮሮና ቫይረስ አቅርቦቶች ማእከል ስራ ጀመረ

የኢትዮጵያ መንግስት እና የተባበሩት መንግስታት የዓለም የምግብ ፕሮግራም (WFP) የኮቪድ 19 አቅርቦቶች ፣ መሣሪያዎች እና ሰብአዊ ሰራተኞች በኢትዮጵያና በመላው አፍሪካ በአየር እንዲጓጓዙ የሚያስችል አዲስ ማዕከል ከፈተ፡፡ ማእከሉ የተከፈተው በቦሌ ዓለም አቀፍ አውሮፕላን ማረፊያ ውስጥ ነው፡፡

የአዲስ አበባው ሰብዓዊ የአየር ማእከል፣ የተባበሩት መንግስታት ለኮሮና ቫይረስ መከላከል ስራ የሚውሉ የመከላከያ እና የህክምና መሳሪያዎች ማከማቻና ማሰራጫ ማእከሎች እንዲቋቋሙ ያቀረበው ጥያቄ አካል ነው፡፡ የዓለም ምግብ ፕሮግራምም ለዚሁ አገልግሎት የሚውለውን ማእከል በኢትዮጵያ መንግስት ድጋፍ አዲስ አበባ ላይ ከፍቶ ስራ አስጀምሯል፡፡

ትናንት ምሽት ለአፍሪካ ሀገራት ከተባበሩት ዓረብ ኤሚሬቶች የተላከ የኮሮና ቫይረስ መከላከያ ቁሳቁሶች ድጋፍ ወደ ማእከሉ ገብቷል፡፡

የዓለም ጤና ድርጅትም ለ32 የአፍሪካ ሀገራት የላከው የመጀመሪያ የካርጎ በረራ ቁሳቁሱን በማእከሉ ማራገፉን ድርጅቱ አስታውቋል፡፡

ለዓለም አቀፉ ማህበረሰብ አገልግሎት የሚሰጥ ማእከል በአዲስ አበባ እንዲከፈት ትብብር በማድረጉ የኢትዮጵያ መንግስት ኩራት እንደሚሰማው የገንዘብ ሚኒስትር ዴኤታው አድማሱ ነበበ ገልጸዋል፡፡ “ዓለም ኮሮናቫይረስን ለመከላከል ለሚያደርገው ጥረት የበኩላችንን አስተዋጽኦ በማድረጋችን ክብር ይሰማናል” ሲሉም ሚኒስትር ዴኤታው ተናግረዋል፡፡

“ይሄን የአየር ማእከል በጥቂት ቀናት ለማቋቋም አየር መንገዱና የጉምሩክ ባለስልጣናት ከፍተኛ እገዛ አድርገውልናል” ያሉት የዓለም ምግብ ፕሮግራም የኢትዮጵያ ዳይሬክተር እና ተወካይ ስቲቭ ዌሬ ኦማሞ የኢትዮጵያን መንግስት አመስግነዋል፡፡

የዓለም ምግብ ፐሮግራም እንዳለው የኮሮና ቫይረስ መከላከያ ቁሳቁሶች ከማእከሉ በመነሳት ለአፍሪካ ሀገራት የሚሰራጩ ይሆናል፡፡