ኢትዮጵያ ልዩ የሆኑ 3 ሺህ ፎቶዎችን በዲጂታል መልክ ለቱሪስቶች ልታቀርብ ነው

የፎቶግራፍ ባለሙያዎች ስራዎቻቸውን ለሽያጭ ማቅረብ የሚችሉበት አሰራርም እየተዘረጋ ነው

በኢትዮጵያ ልዩ የሆኑ 3 ሺህ ፎቶዎችን በዲጂታል መልክ ለቱሪስቶች ተደራሽ ለማድረግ እየተሰራ መሆኑ ተገለፀ።

የኢኖቬሽንና ቴክኖሎጂ ሚኒስቴር እና የባህልና ቱሪዝም ሚኒስቴር የቱሪዝም ዘርፉን ማዘመን የሚያስችላቸውን ስምምነት አድርገው ወደ ስራ መግባቸው ይታወቃል።

የስምምነቱ አንዱ አካል የሆነው የተመረጡና ባለቤታቸው ባህልና ቱሪም ሚኒስቴር የሆነ 3 ሺህ ፎቶዎችን በኦንላይን ለእይታ ማቅረብ የሚያስችል አስራር እየተዘረጋ መሆኑን ከኢኖቬሽንና ቴክኖሎጂ ሚኒስቴር ያገኘነው መረጃ ያመለክታል።

አሰራሩ ፎቶ መግዛት የሚፈልጉ ቱሪስቶች የሚፈልጓቸውን ፎቶዎች ባለቡት ቦታ ሆነው እንዲገዙና በፈለጉት መጠን ተሰርቶ እንዲላክላቸው የሚያስችል ነው።

በኢኖቬሽንና ቴክኖሎጂ ሚኒስቴር የዲጂታል ትራንስፎርሜሽን ፕሮግራም ማኔጀር አቤል ሰለሞን፤ የፎቶ ግራፍ ባለሙያዎች ስራዎቻቸውን በዚህ ስርዓት ውስጥ በማስገባት ለሽያጭ የሚያቀርቡበት መንገድ ይመቻቻል ብለዋል።

በኢኮሜርስ አማካኝነምት ፎቶዎች ለሽያጭ ቀርበው የውጭ ምንዛሬ ማግኘት የሚያስችል አሰራር እየተዘረጋ መሆኑን ጠቁመዋል።

ወደ ስርዓቱ የሚገቡት ፎቶዎች መውረድ የማይችሉ፣ ባለቤት ያላቸውና ደረጃቸውን የጠበቁ ሲሆኑ ስርዓቱ ለስራ ፈጠራ፣ ለውጭ ምንዛሬ ግኝትና ቱሪዝም ለማስተዋወቅ ትልቅ ጠቀሜታ ይኖረዋልም ብለዋል።

ቱሪዝምን ዲጂታል ማድረግ የኢትዮጵያ የዲጂታል ትራንስፎርሜሽን ስትራቴጂ አንዱ አካል ነው።