የቀጣዩ ክረምት ወራት የአውሮፓ ክለቦች የተጫዋች ዝውውር ምን ይመስል ይሆን?

ከፒኤስጂ ጋር ያለው ኮንትራት ሊጠናቀቅ ቀናት የቀሩት ሊዮኔል ሜሲ ወዴት ያመራ ይሆን?

የአውሮፓ ክለቦች የዘንድሮውን ውድድር ሊያጠናቅቁ በጣት የሚቆጠሩ ጨዋታዎች ብቻ ቀርቷቸዋል፡፡ በጣልያን በስፔን እና በእንግሊዝ የዓመቱ አሸናፊዎች የተለዩ ሲሆን በጀርመን እና በፈረንሳይ አሸናፊዎቹ ክለቦች ገና አልተለዩም፡፡

በነዚህ ሀገራት ውስጥ ለአውሮፓ ቻምፒዮንስ ሊግ ለማለፍ እየተደረገ ያለው ጥረትም በመጠናቀቅ ላይ መሆናቸውን ተከትሎ ከወዲሁ ስለ ቀጣዩ ዓመት ውድድር ዝግጅት ተጀምሯል፡፡

በአውሮፓ የተጫዋቾች ዝውውር ሊጀመር የአንድ ወር እድሜ ብቻ የቀረው ሲሆን ይህን ተከትሎ የተጫዋች ወኪሎች እና ክለቦች ከወዲሁ ስለ ዝውውር መወያየት ጀምረዋል ተብሏል፡፡

• ሊዮኔል ሜሲ ከሳዑዲ አረቢያው ክለብ በዓመት 320 ሚሊየን ፓውንድ ክፍያ ቀረበለት

በዚህ መሰረትም በዘንድሮው የክረምት ወራት ክለቦች የሚያተኩሩባቸው ተጫዋቾች እነማን ይሆናሉ የሚለው የብዙዎችን ትኩረት ስቧል፡፡

ከብዙ ዓመታት በኋላ የጣልያንን ዋንጫ ያሸነፈው ናፖሊ የክለቡ ከፍተኛ ግብ አግቢ የሖነው አጥቂው ቪክተር ኦስሜን ብዙ ክለቦችን አይናቸውን ጥለውበታል ሲል ዩሮ ኒውስ አስነብቧል፡፡

ናይጀሪያዊው አጥቂ ኦስሜን በዘንድሮው የናፖሊ ክለብ ተሳትፎ ላይ ዋነኛው ግብ አግቢ ተጫዋች ሲሆን በ30 ጨዋታዎች ላይ 23 ጎሎችን አስቆጥሯል፡፡

በእያንዳንዱ ጨዋታዎች ላይ አንድ ግብ የማስቆጠር አቅም እንዳለው የተገለጸው ኦስሜን ወደ እንግሊዝ፣ ጀርመን አልያም ስፔን ሀብታም ክለቦች ሊያስፈርሙት ጥረቶችን እያደረጉ ነውም ተብሏል፡፡

ሌላኛው በመጪው የክረምት ዝውውር ጊዜ ተፈላጊ የሆነው የጀርመኑ ቦሪሺያ ዶርትሙንድ ክለብ ተጫዋች እንግሊዛዊው ጄሊድ ቤሊንግሃም ነው፡፡

ተጫዋቹን የስፔኑ ሀያል ክለብ ሪያል ማድሪድ እና የእንግሊዙ ማንችስተር ሲቲ ዋነኞቹ ፈላጊ ክለቦች እንደሆኑ ተገልጿል፡፡

• በጥር ወር የዝውውር መስኮት አዲስ ክብረወሰን ተመዘገበ

ቤሊንግሀም ወደ እንግሊዝ የመመለስ ፍላጎት ቢኖረውም አንጋፋ የመሀል ሜዳ ተጫዋቾቹን እንደሚያሰናብት የሚጠበቀው ሪያል ማድሪድ ምርጫውን ሊያደርግ እንደሚችል የተጫዋቹ ወኪል ተናግሯል፡፡

ሌላኛው የዘንድሮው ዝውውር ተጠባቂ ተጫዋች የምንግዜም ባሎንዶር አሸናፊው ተጫዋች ሊዮኔል ሜሲ ሲሆን በተለይም ተጫዋቹ ከፒኤስጂ ጋር ያለው ስምምነት ከአንድ ወር በኋላ ይጠናቀቃል መባሉን ተከትሎ ብዙ ክለቦች በተጫዋቹ ላይ አይናቸውን ጥለዋል፡፡

ሊዮኔል ሜሲ ወደ ልጅነት ክለቦ ባርሴሎና የማምራት ፍላጎት አለው ቢባልም የሳውዲው አልናስር ክለብን ሊቀላቀል እንደሚችል ተዘግቧል፡፡

ባሳለፍነው ዓመት ክሪስቲያኖ ሮናልዶን ያስፈረመው አል ናስር አሁን ደግሞ በዓለም ክብረ ወሰን ገንዘብ ሊዮኔል ሜሲን ለማስፈረም በጥረት ላይ መሆኑ ተገልጿል፡፡

የተጫዋች የዝውውር ጊዜ በመጣ ቁጥር በከፍተኛ ገንዘብ የተዘዋዋሩ ተጫዋቾች ክብረ ወሰን የሚመዘገብ ሲሆን ብራዚሊያዊው ኔይማር፣ ሊዮኔል ሜሲ፣ ፈረንሳዊው ፖል ፖግባ፣ ክሪስቲያኖ ሮናልዶ እና ሌሎችም ይጠቀሳሉ፡፡

በዘንድሮው የክረምት ዝውውር የትኛው ተጫዋች በክብረ ወሰን ክፍያ ወዴትኛው ክለብ ዝውውሩን የሚያጠናቅቅ ይመስልዎታል?