የኢትዮጵያ ብሔራዊ ቡድን የቀድሞ ተጫዋች ኢታሎ ቫሳሎ ከዚህ ዓለም በሞት ተለየ

ኢታሎ በክለብ ደረጃ ለኤርትራው ሀማሴን፣ ለድሬዳዋው ጥጥ ማኅበር እና ለኤሌክትሪክ ተጫውቷል

የኢትዮጵያ ብሔራዊ ቡድን የቀድሞ ተጫዋች ኢታሎ ቫሳሎ ከዚህ ዓለም በሞት መለየቱን የኢትዮጵያ እግር ኳስ ፌዴሬሽን አስታወቀ።

በአስመራ ከተማ የተወለደው ኢታሎ፤ ኢትዮጵያ የሶስተኛውን የአፍሪካ ዋንጫን አስተናግዳ ስታሸንፍ የኢትዮጵያ ብሔራዊ ቡድን ሁነኛ ጫዋች እንደነበር ይታወሳል።

ኢትዮጵያ እና ግብፅ ለፍጻሜ ባደረጉት ጨዋታ ኢታሎ ቫሳሎ ግብ በማስቆጠር የማይረሳ የእግር ኳስ ታሪክ አስመዝግቧል።

ኢታሎ በብሔራዊ ቡድን ደረጃ ለኢትዮጵያ በክለብ ደረጃ ደግሞ ለኤርትራው ሀማሴን፣ ለድሬዳዋው ጥጥ ማኅበር እና ለኤሌክትሪክ ተጫውቷል።

ኢታሎ ከወንድሙ ሉቻኖ ቫሳሎ ጋር ለረጅም ጊዜያት ለብሔራዊ ቡድን መጫወትም ችሏል።

የኢትዮጵያ እግር ኳስ ፌዴሬሽን በኢታሎ ቫሳሎ ህልፈት የተሰማውን ሀዘን በይፋዊ የፌስቡክ ገጹ አስፍሯል።