የፍሬንድስ ተከታታይ ፊልም’ ተዋናይ ማቲው ፔሪ በመኖሪያ ቤቱ ውስጥ ሞቶ ተገኘ

በ1990 ዎቹ ታዋቂው የፍሬንድስ ተከታታይ የቴሌቪዥን ድራማ ተዋናዩ ማቲው ፔሪ በ54 ዓመቱ ነው ህይወቱ ያለፈው

ፍሬንድስ በተሰኘው የቴሌቪዥን ድራማ ተዋናይ የሆነው ማቲው ፔሪ በሎስ አንጀለስ በሚገኘው መኖሪያ ቤቱ ውስጥ ሞቶ መገኘቱን የአሜሪካ ሚዲያዎ ገልጸዋል።

የሎስ አንጀለስ ታይምስ እና የቲኤምዜድ ድረ-ገጽ እንደዘገቡት እ.ኤ.አ. በ1990ዎቹ በታዋቂው የአሜሪካ የቴሌቭዥን ተከታታይ አስቂኝ ድራማ ላይ በተጫወተው ሚና የሚታወቀው ተዋናይ ማቲው ፔሪ በ54 አመቱ ህይወቱ አልፏል።

ተዋናይ ማቲው ፔሪ በሎስ አንጀለስ አካባቢ በሚገኝ መኖሪያ ቤት መታጠቢያ ገንዳ ውስጥ ሞቶ መገኘቱን ፖሊስ አስታውቋል።

የሎስ አንጀለስ ፖሊስ ዲፓርትመንት ቃል አቀባይ እንዳስታወቁት፤ እንደዘገበው፣ የድንገተኛ አደጋ ሠራተኞች መጀመሪያ ከቤቱ የደረሳቸው ሪፖርት አንድ ሰው በልብ ድካም መያዙን የሚያመላክት ነበር።

እንደ ቲኤምዜድ መረጃ ከሆነ፣ በቦታው ላይ ምንም ዓይነት መድኃኒት (እፅ) አልተገኘም፤ የወንጀል ድርጊት ተፈፅሟል የሚል ጥርጣሬም የለም።

‘ፍሬንድስ’ የተሰኘው የአሜሪካ የቴሌቪዥን ‘ሲትኮም’ በዴቪድ ክሬን እና ማርታ ካውፍማን የተዘጋጀ ሲሆን መጀመሪያ አየር ላይ የዋለው እ.አ.አ ከመስከረም 22 ቀን 1994 እስከ ግንቦት 6 ቀን 2004 ነበር።

ለ10 ሲዝን የዘለቀው አስቂኝ ድራማው ዋና ተዋናዮች ዛሬ በድንገት ሕይወቱ ያለውፈው ማቲው ፔሪን ጨምሮ ጄኒፈር አኒሽተን፣ ኮርትኒ ኮክስ፣ ሊሳ ኩድሮው፣ ማት ለብላንክ እና ዴቪድ ሽዊመር ነበሩ።