ሄሜቲ የሱዳን ጦር የቦምብ ጥቃቱን ካላቆመ ድርድር አይኖርም አሉ

ሄሜቲ በደቡብ ሱዳን ከአልቡርሃን ጋር ፊት ለፊት ለመደራደር ፍላጎት ማሳየታቸው ይታወሳል

የሱዳን ፈጥኖ ደራሽ ሃይል መሪው ጀነራል ሃምዳን ዳጋሎ (ሄሜቲ) የሱዳን ጦር የሚፈጽመውን የአየር ላይ ጥቃት እስካላቆመ ድረስ ለድርድር አንቀመጥም ብለዋል።

• የሱዳን ጦርነት ለጎረቤት ሀገራት ዳፋ ምንድን ነው?
• በሱዳን ያለው አለመረጋጋት ኢትዮጵያን መጉዳቱ እንደማይቀር የውጭ ጉዳይ ሚኒስቴር አስታወቀ

ጦሩ “በግዴለሽነት” ሃይላችን በቦምብ እየደበደበ ነው ያሉት ጀነራል ሃምዳን ዳጋሎ፥ የተኩስ አቁም ስምምነቱ መጣሱን አብራርተዋል።

“ሱዳን እንድትፈራርስ አንፈልግም” በማለትም የጀነራል አልቡርሃን ጦር ግጭት እያባባሰ ነው ስሉ ከሰዋል።

በጎረቤት ሀገራት፣ በአሜሪካ እና በመንግስታቱ ድርጅት አማካኝነት የተኩስ አቁም ስምምነቱ ከሀሙስ ምሽት ጀምሮ ለ72 ስአት እንዲራዘመ መደረጉ ይታወሳል።

ጀነራል ሃምዳን ዳጋሎም በደቡብ ሱዳን ከጀነራል አብዱልፈታህ አልቡርሃን ጋር ፊት ለፊት ለመደራደር ፍላጎት ማሳየታቸው አይገለጽም።

ይሁን እንጂ ሄሜቲ ከቢቢሲ ጋር ባደረጉት ቆይታ የሱዳን ጦር በቦምብ መደብደቡን እስከቀጠለ ድረስ ድርድር የሚታሰብ ጉዳይ አይደለም ሲሉ ተናግረዋል።

የተኩስ አቁሙ ተገባራዊ ሆኖ ግጭቱ ከበረደ በኋላ ግን ለመደራደር ዝግጁ ነኝ ማለታቸው ተዘግቧል።

“ከአልቡርሃን ጋር የግል ጸብ የለኝም” ያሉት ሄሜቲ፥ ይሁን እንጂ የቀድሞውን ፕሬዝዳንት ኦማር ሀሰን አልበሽር ታማኝ ደጋፊዎች መሰብሰባቸውን በመጥቀስ በከሃዲነት ከሰዋቸዋል።

በ2019 አልበሽርን ከአልቡርሃን ጋር በመሆን ያስወገዱት ሄሜቲ፥ “የሲቪል አስተዳደር ነገ ሳይሆን ዛሬ እንዲመሰረት እፈልጋለሁ” ብለዋል።

ይሁን እንጂ በ2021 ጠቅላይ ሚኒስትር አብደላ ሃምዶክ ላይ በተደረገው መፈንቅለ መንግስት ተሳትፎ እንዳላቸው የሚጠቅሱ ተንታኞች፥ የአሁኑ ጦርነት የሲቪል አስተዳደር ከመሻት የመነጨ እንዳልሆነ ያነሳሉ።

 የመንግስታቱ ድርጅት የጀነራል ዳጋሎ ሃይሎች በንጹሃን ላይ ዘረፋ እየፈጸሙ ነው የሚል መግለጫ አውጥቷል።

ሄሜቲ ግን የኛን ዩኒፎርም በመልበስ ስማችንን ለማጠልሸት የሚደረግ የጦሩ ሴራ ነው ብለውታል።

ሁለት ሳምንት የደፈነው የሱዳን ጦርና የአርኤስኤፍ ጦርነት እስካሁን ከ500 በላይ ሰዎችን ህይወት መንጠቁና ከ4 ሺህ በላይ ሰዎችን ማቁሰሉ ተነግሯል።

በመቶ ሺዎች የሚቆጠሩ ሱዳናውያንም ቀያቸውን ለመልቀቅ መገደዳቸውን ነው የመንግስታቱ ድርጅት መረጃ የሚያሳየው።