ሀሰተኛ የቦንብ ሽብሮች ከ10 በላይ የህንድ በረራዎችን አስተጓጎሉ

በህንድ አየር መንገድ ጉዳዩ የተለመደ ቢሆንም ባለፉት ሁለት ቀናት በተደጋጋሚ እየቀረቡ የሚገኙ ጥቆማዎች ምንጭ ምን እንደሆነ አልታወቀም

ባለፉት 48 ሰአታት በህንድ በረራዎች ላይ የቀረበውን ሀሰተኛ የቦንብ ሽብር ጥቆማዎችን ተከትሎ 10 በረራዎች እንደተስተጓጎሉ ተነገረ።

በትላንትናው እለት የሲንጋፖር አየር ሀይል ቦንብ ተጠምዶባቸዋል የተባሉትን አውሮፕላኖች በተዋጊ ጄቶች በማጀብ ህዝብ ከሚሰበሰብባቸው አካባቢዎች ራቅ ብለው እንዲቀመጡ አድርጓል፡፡

• በተሳሳተ የቦምብ ስጋት በራረውን ያቋረጠው አውሮፕላን

ይህ ከመሆኑ ከሰአታት በፊት የኢንዲያ ኤክፕረስ ንብረት የሆነ ከደልሂ ወደ አሜሪካ ቺካጎ ሲጓዝ የነበረ አውሮፕላን የቦንብ ስጋቱን ተከትሎ በካናዳ እንዲያርፍ ተገዷል፡፡

ሆክስ ቦምብ ትሬት ወይም ሀሰተኛ የቦምብ ማስፈራርያዎች በብዛት ህዝብ በሚበዛባቸው አካባቢዎች ፈንጂዎች ስለመጠመዳቸው ለጸጥታ አከላት የሚደረጉ ጥቆማዎች ናቸው፡፡

በህንድ አየር መንገድ ጉዳዩ የተለመደ ቢሆንም ባለፉት ሁለት ቀናት በተደጋጋሚ እየቀረቡ የሚገኙ ጥቆማዎች ምንጭ ምን እንደሆነ አልታወቀም፡፡

የአሁኑ ጥቃት ለየት የሚያደርገው ኤር ኢንዲያን ጨምሮ በሶስት የተለያዩ የአየር ትራንስፖርት በሚሰጡ ድርጅቶች ንብረት በሆኑ አውሮፕላኖች ላይ ተደጋጋሚ ጥቆማ መድረሱ ነው፡፡

ሰኞ እለት በኤክስ (ትዊተር) ገጽ ላይ በአውሮፕላኖች ላይ ቦምብ ስለመጠመዱ አንድ ማስፈራርያ ከተለጠፈ በኋላ መነሻቸውን ከህንድ ሙምባይ ያደረጉ 3 አለም አቀፍ በረራዎች እንዲዘገዩ የተደረገ ሲሆን፤ ከጉዳዩ ጋር በተገናኘ የተጠረጠረ አንድ ታዳጊ በፖሊስ ተይዞ ምርመራ እየጠደረገበት እንደሚገኝ ቢቢሲ ዘግቧል፡፡

በተመሳሳይ በትላንትናው እለት በኤር ኢንድያ ንብረት በሆነ አውሮፕላን ላይ የበረራ ቁጥሮ ተጠቅሶ በተለጠፈ የቦምብ ስጋት 7 በረራዎች እንዲሰረዙ ተደርጓል፡፡

በበረራዎቹ መዘገየት እና መሰረዝ ከፍተኛ ኪሳራ እንደደረሰባቸው ያስታወቁት አየር መንገዶቹ ከሲቪል አቭየሽን ደህንነት ባለስልጣናት እና ከፖሊስ ጋር በመተባበር ጉዳዩን ለማጣራት እየሰሩ እንደሚገኙ ገልጸዋል፡፡

እያንዳንዱ የህንድ አውሮፕላን ማረፊያ የአደጋ ክብደት የሚገመግም እና በዚህ መሰረት እርምጃ የሚወስድ የቦምብ ስጋት ግምገማ ኮሚቴ አለው። 

ማስፈራሪያው የቦምብ አወጋገድ ቡድን፣ አነፍናፊ ውሾች፣ አምቡላንስ፣ ፖሊስ እና የዶክተሮች ተሳትፎ ሊያስከትል ይችላል።

 የቀረበውን ስጋት ተከትሎ ተሳፋሪዎች ከነሻንጣቸው እና በካርጎ ከተጫኑ ጭነቶች ጋር እንዲወርዱ ከተደረገ በኋላ የኢንጂነሪንግ እና የደህንነት ቡድኖች አውሮፕላኑ ድጋሚ ወደ አየር ላይ ከመውጣቱ በፊት አስፈላጊውን ማጣርያ የሚያደርጉ ሲሆን በዚህ ሂደት አየር መንገዶች በሺህ ዶላሮች የሚቆጠር ኪሳራ ያጋጥማቸዋል፡፡