ኢጋድ ሱዳን የአስቸኳይ ጊዜ አዋጅ ማንሳቷን እና እስረኞች መልቀቋን በበጎ ተቀበለ

የሱዳን ወታደራዊ አመራሩ የሲቪል አስተዳደሩን ካፈረሰ በኋላ ጥሎት የነበረውን አስቸኳይ ጊዜ አዋጅ አንስቷል

የኢጋድ ዋና ጸኃፊ ዶ/ር ወርቅነህ ገበየሁ የሱዳን ሉአላዊ የሽግግር ም/ቤት የአስቸኳይ ጊዜ አዋጅ ማንሳቷን እና እስረኞች መልቀቋን በበጎ እንደሚቀበሉት ገለጹ፡፡

ዋና ጸሃፊው በሱዳን ሁሉን አቀፍ ንግግር ለማድረግ መልካም እርምጃ ነው ብለዋል፡፡

• በሱዳን ተጥሎ የነበረው የአስቸኳይ ጊዜ አዋጅ ተነሳ

ዶ/ር ወርቅነህ ሁሉም ባለድርሻ አካላት፣ ዋና ዋና የፖለቲካ ፓርቲዎች፣ ወታደራዊ፣ የሲቪክ ማህበራት እና ወጣቶች የሀገሪቱን ችግሮች በውይይት እና በውይይት እንዲፈቱ አበረታትተዋል፡፡

ዶ/ር ወርቅነህ ሁሉም አካላት ሕገ መንግሥታዊ ሥርዓቱን ወደነበረበትና ወደ ዲሞክራሲያዊ ሥርዓት ለመመለስ የሚያስችል ሂደትን ሙሉ በሙሉ እንዲደግፉና በንቃት እንዲሳተፉ አሳስበዋል።

ስልጣን የተቆጣጠረው የሱዳን ጦርም የሲቪል አስተዳድሩን ከስልጣን በማገድ የራሱን ወታደራዊ መንግስት ማቋቋሙን ተከትሎ የአስቸኳይ ጊዜ አዋጅ ማወጁ ይታወሳል።

ሱዳናዊያንም የሀገሪቱ ጦር ስልጣን ለሲቪል አስተዳድር እንዲያስረክብ ሀገር አቀፍ ተቃውሞዎችን ሲያካሂዱ ቆይተዋል።

ሱዳናዊያን አሁንም ተቃውሟቸውን በተለያዩ መንገዶች የቀጠሉ ሲሆን፤ በጀነራል አልቡርሃን የሚመራው የሱዳን ወታደራዊ መንግስትም ጥሎት የነበረውን የአስቸኳይ ጊዜ አዋጅ ከስድስት ወራት በኋላ ማንሳቱን ገልጿል።

ወታደራዊ የሽግግር ጊዜ አስተዳድር እንዳሳወቀው የአስቸኳይ ጊዜ አዋጁ የተነሳው በሀገሪቱ ለተጀመረው ብሄራዊ ውይይት መደላድል ለመፍጠር በማሰብ ነው ብሏል።ሱዳናዊያን በሀገሪቱ ወታደራዊ መንግስት ላይ ተቃውሟቸውን የቀጠሉ ሲሆን የሱዳን የጸጥታ ሀይሎች እስካሁን ከ100 በላይ ተቃዋሚ ዜጎችን ተኩሰው ገድለዋል ተብሏል።

የሀገሪቱ የጸጥታ ሀይሎች ከዚህ በተጨማሪም የተለያዩ ተቃዋሚዎችን እና መሪዎችን እንዳሰረ የተገለጸ ሲሆን የታሰሩት እንዲፈቱ ተመድን ጨምሮ በርካቶች በማሳሰብ ላይ ናቸው።