እስራኤል የተኩስ አቁም ተደራዳሪ ቡድኗን ከዶሃ አስወጣች

እስራኤል የጸጥታው ምክርቤት በጋዛ በአስቸኳይ ተኩስ እንዲቆም ውሳኔ ባሳለፈ ማግስት የምትወስደውን እርምጃ ይበልጥ ማጠናከሯ ተገልጿል

እስራኤል የተኩስ አቁም ተደራዳሪ ቡድኗን ከኳታር አስወጣች።

በኳታርና ግብጽ አደራዳሪነት በዶሃ ሲካሄድ የቆየው ንግግር በሃማስ ቅድመ ሁኔታዎች ምክንያት ሳይሳካ መቅረቱን የእስራኤል ባለስልጣናት ተናግረዋል።

በድርድሩ ላይ ለተሳተፉት የእስራኤል የስለላ ድርጅት ሃላፊ ቅርበት ያላቸው ግለሰብን ዋቢ አድርጎ ሬውተርስ እንደዘገበው፥ እስራኤል በጋዛ የሚገኙት የሃማስ መሪ ያህያ ሲንዋር ድርድሩን እያወኩ ነው በሚል ከሳለች።

ሃማስ በበኩሉ እስራኤል የተኩስ አቁም ድርድሩ እንዲጓተት የምትፈልገው በጋዛ ድብደባዋን ለመቀጠል ነው ሲል ወቅሷል።

• ኔታንያሁ የእስራኤልን የልኡካን ቡድን የዋሽንግተን ጉዞ እቅድ መሰረዛቸው አሜሪካን አስቆጣ

እስራኤልና ሃማስ ለስድስት ሳምንታት ተኩስ አቁመው ከ130 የእስራኤል ታጋቾች 40ዎቹ እንዲለቀቁ ነበር ድርድር ሲደረግ የቆየው።

ሃማስ የእስራኤል ወታደሮች ከጋዛ ሙሉ በሙሉ የሚወጡበትና ጦርነቱ የሚቆምበትን እንጂ ጊዜያዊ የተኩስ አቁም ላይ መደራደር እንደማይፈልግ መግለጹ ተዘግቧል።

የፍልስጤሙ ቡድን በጦርነቱ ምክንያት ወደ ደቡባዊ ጋዛ የተፈናቀሉ በመቶ ሺዎች የሚቆጠሩ ዜጎች ወደ ቀያቸው እንዲመለሱም ጠይቁል።

እስራኤል ሃማስ በጠየቀው ልክ ባይሆንም የተወሰኑ ፍልስጤማውያን ወደ ሰሜናዊ ጋዛ በመመለስና ከ700 እስከ 800 ፍልስጤማውያን እስረኞችን በመፍታት ታጋቾችን ለማስለቀቅ ተስማምታ ነበር።

ይሁን እንጂ ሃማስ ፍልስጤማውያን ተኩስ እንዲቆም እንደማይፈልጉ ያመላከተ “ቅዠት” የሚመስል ቅድመ ሁኔታ አስቀምጧል ብለዋል ጠቅላይ ሚኒስትር ቤንያሚን ኔታንያሁ።

ከዚህ ቀደምም የቡድኑን ቅድመ ሁኔታዎች የሚያጣጥሉት ኔታንያሁ ጦራቸው ከጋዛ እንደማይወጣና ጦርነቱ እንደሚቀጥል የሚያሳይ መግለጫ አውጥተዋል።

በቴል አቪቭ የሚገኙ ከ300 በላይ የታጋቾች ቤተሰቦች በአስቸኳይ የተኩስ አቁም ስምምነት ተደርሶ ታጋቾቹ እንዲለቀቁ በሀገሪቱ የመከላከያ ሚኒስቴር ቢሮ ተቃውሟቸውን እያሰሙ ነው።

እስራኤል የጸጥታው ምክርቤት በጋዛ በአስቸኳይ ተኩስ እንዲቆም የቀረበውን የውሳኔ ሃሳብ ባጸደቀ ማግስት ተደራዳሪዎቿን ከዶሃ አስወጥታለች።

በራፋህ እና በሌሎች ከተሞች እየፈጸመችው ያለው ጥቃትም ይበልጥ እየጨመረ መሄዱን የጋዛ ጤና ሚኒስቴር አሃዛዊ መረጃዎች ያሳያሉ።