የእስራኤሉ ‘አውራ’ ኩባንያ በኢትዮጵያ የኢኖቬሽን ማእከል ሊከፍት መሆኑን አስታወቀ

የኩባንያው አየር ማጽጃ ቴክኖሎጂ 99.97 በመቶ ቫይረሶችንና ባክቴሪያዎችን ከከባቢ አየር ላይ የማጽዳት አቅም አለው

በአየር ንጽህና ላይ የሚሰራው የእስራኤሉ ‘አውራ ኤይር’ ኩባንያ በኢትዮጵያ የማምረቻ እና የኢኖቬሽን ማዕከል ሊከፍት መሆኑን አስታወቀ።

ኩባንያው በኢትዮጵያ ለመክፈት ያቀደው ማዕከል ለስልጠና እና የአየር ንጽህናን ለመጠበቅ የሚያስችሉ ቴክኖሎጂዎችን ለማቅረብ የሚስችለው መሆኑን ኩባንያው ያወጣውን መግለጫ በመጥቀስ ጄሩሳልም ፖስተ ዘግቧል።

ኩባንያው ማዕከሉን ኢትዮጵያ በማድረግም ከጤና ጋር የተያያዙ ፕሮጄክቶችን በመላው አፍሪካ የሚተገብር መሆኑም በመግለጫው ተመላክቷል።

ኩባንያው ማእከሉን በኢትዮጵያ ለመክፈት ከስምምነት የደረሰውም የኩባንያው ተወካዮች ከተለያዩ አፍሪካ ሀገራት ከተውጣጡ አምባሳደሮች ጋር ከተወያዩ በኋላ መሆኑንም አስታውቋል።

በውይይቱ ወቅት ለአምባሳደሮቹ የእስራኤል የአየር ንጽህና መጠበቂያ ስርዓት ዙሪያ ማብራሪያ መሰጠቱ እና እስራኤል በዚህ በኩል ያላትን ልምድ ለአፍሪካ ኮቪድ-19 መከላከያ በምን መልኩ መተግበር ይቻላል በሚለው ላይም መምከራቸው ተነግሯል።

በውይይቱ ላይ የኢትዮጵያ፣ አንጎላ፣ ካሜሮን፣ ዴሞክራቲክ ሪፐብሊክ ኮንጎ፣ ኢኳቶሪያል ጊኒ፣ ጋና፣ ናይጄሪያ፣ ሩዋንዳ፣ ሞዛምቢክ እና ዛምቢያ አምባሳደሮች መገኘታቸውም ተገልጿል።

ከሶስት ዓመት በፊት የተመሰረተው የእስራኤሉ ‘አውራ ኤይር’ ኩባንያ የሚጠቀመው አየርን ማጽጃ ስርዓት በእስራኤል ትልቁ በሆነው ሼባ የህክምና ማዕከል ውስጥ ለአንድ ወር ተሞክሮ የኮሮናቫይረስ ቅንጣቶችን የማስወገድ አቅም እንዳለው ተነግሮለታል።

የኩባንያው አየር ማጽጃ ቴክኖሎጂ 99.97 በመቶ ቫይረሶችን እና ባክቴሪያዎችን ከከባቢ አየረ ላይ የማጽዳት አቅም ያለው መሆኑንም ነው የኩባንያው መረጃ የሚያመለክተው።

አርቴፊሻል ኢንተለጀንስ ላይ ተመስርቶ የሚሰራው የኩባንያው የአየር ማጽጃ ስርዓት ለቤት ውስጥ እና ለውጭ የሚሰራ ሲሆን፥ ጎጂ የሆነ መርዛማ ጋዝ አየር ውስጥ ሲኖርም በመተግበሪያ አማካኝነት ለሰዎች የሚያሳውቅ ነው ተብሏል።

ቴክኖሎጂው ከአፍሪካ ውጭ በበርካታ የዓለም ሀገራት ውስጥ በመንግስት ህንጻዎች ላይ፣ በስፖስር ማዘውተሪያና መዝናኛ ማእከላት፣ በትምህርት ቤቶች፣ በሆስፒታሎች፣ በሆቴሎች እንዲሁም በህዝብ ትራንስፖርቶች ላይ ተገጥሞ አገልግሎት እየሰጠ መሆኑም ተነግሯል።