ምባፔ ለአርጀንቲናዊው ግብ ጠባቂ ያልተገባ ደስታ አገላለጽ ምላሽ ሰጠ

ፈረንሳዊው አጥቂ ግን ስለማርቲኔዝ የደስታ አገላለጽ ሲጠየቅ “ለማይረባ ጉዳይ ጊዜዬን አላጠፋም” የሚል ምላሽ ሰጥቷል

በኳታሩ የአለም ዋንጫ የፍጻሜ ፍልሚያ የወርቅ ጓንት ተሸላሚው የወርቅ ጫማ በወሰደው ድንቅ ተጫዋች ላይ ለመሳለቅ የሄደበት ርቀት በስፖርቱ ቤተሰብ ሲያስተቸው ቆይቷል።

በሉሳይል ስታዲየሙ ፍልሚያ ፈረንሳዊው ኪሊያን ምባፔ ሶስት ጎሎችን በማስቆጠር ሀገሩን ከመመራት መልሶ አቻ ቢያደርግም ዋንጫውን መሳም አልቻለም።

ተጨማሪው ደቂቃ ሊጠናቀቀ ሰከንዶች ሲቀሩ አስደናቂ ግብ ሊሆን የሚችል ሙከራን እና የመለያ ምቶችን አድኖ የ36 አመታት የአርጀንቲና የዋንጫ ፍለጋ ጉዞ ያሳካው ኢሚሊያኖ ማርቲኔዝም ከምባፔ አጽናኞች አንዱ ነበር።

ማርቲኔዝ ግን ሶስት ጎሎች ያስቆጠረበት የአለም ኮከብ ላይ ለመዘባበት ጊዜ አልወሰደበትም።

ወደ መልበሻ ክፍል እንደገቡ ለምባፔ የአንድ ደቂቃ የህሊና ጸሎት እናድርግለት በሚል ተሳልቋል።

ወደ ቦነስ አይረስ አምርተው ደስታቸውን በተሽከርካሪዎች እየተዘዋወሩ ሲገልጹም የምባፔ ምስል ያለበትን አሻንጉሊት ይዞ መታየቱ ከፍተኛ ትችት እንዲያስተናግድ አድርጎታል።

24ኛ አመት ልደቱን ያከበረው ኪሊያን ምባፔ ግን ምንም አይነት ምላሽ ሳይሰጠው ቆይቷል።

አር ኤም ኤስ ስፖርት ከተባለ የፈረንሳይ መገናኛ ብዙሃን ለቀረበለት ጥያቄ ምላሽ ሲስጥም “በማይረባ ጉዳይ ጊዜዬን ማባከን አልፈልግም” ነው ያለው።

ከደስታ አገላለጽ ጋር በተያያዘ ችግር የለብኝ ያለው ምባፔ ፥ የታህሳስ 18ቱ የኳታር የአለም ዋንጫ ፍጻሜ ውጤት ከክለብ አጋሩ ሊዮኔል ሜሲ ጋር ያለውን ግንኙነት እንዳልበጠበጠ ያነሳል።

“ሜሲ የአለም ዋንጫውን በህይወት ዘመኑ አጥብቆ የሚሻው ነው፤ እኔም እንደዛው ፤ ግን ደግሞ ከጨዋታው በኋላም እንኳን ደስ አለህ ብየዋለሁ” ሲልም ያክላል ምባፔ።

ስለ ማርቲኔዝ ድርጊት ሲጠየቅም ጊዜየን በከንቱ አላጠፋም ማለቱ ለአስቶንቪላው ግብ ጠባቂ ግልጽ ምላሽ ነው ተብሏል።

ኢሚሊያኖ ማርቲኔዝ ዛሬ ወደ ልምምድ ሲመለስ የክለቡ አሰልጣኝ ኡናይ ኢምሪ በጉዳዩ ዙሪያ እንደሚያነጋግሩት ተናግረዋል።

ማርቲኔዝ በአለም ዋንጫው ፍጻሜ ባሳየው የደስታ አገላለጽ ፈረንሳውያን የእግር ኳስ ተጫዋቾችና ፖለቲከኞች የተሰጠው የምርጥ ግብ ጠባቂነት ሽልማት እንዲነጠቅ እየወተወቱ ነው።

የፓሪስ ሴንት ጄርሜኑ ኪሊያን ምባፔ ግን ትናንት በስትራስበርግ ላይ የድል ጎል አስቆጥሮ ክለቡ በፈረንሳይ ሊግ 1 በስምንት ነጥቦች እንዲመራ አድርጎ የስኬት ጉዞውን አስቀጥሏል።

በ13 ጎሎችም የሊጉን ኮከብ ጎል አስቆጣሪነት እየመራ ነው።