በኢትዮጵያ የዝንጀሮ ፈንጣጣ በሽታን ለመለየት የሚያስችሉ 50 የላብራቶሪ ማዕከላት ተደራጅተዋል ተባለ

በሽታውን ለመከላከል በ20 የሃገሪቱ መግቢያ እና መውጫ በሮች ላይ ጥብቅ ቁጥጥር እየተደረገ እንደሚገኝ ተገልጿል

የዝንጀሮ ፈንጣጣን (ሞንኪ ፖክስ) ለመከላከል በ20 የኢትዮጵያ መግቢያ እና መውጫ በሮች ላይ ቁጥጥር እየተደረገ ነው ተባለ፡፡

የዝንጀሮ ፈንጣጣ እስካሁን በኢትዮጵያ ተከስቶ አያውቅም ያሉት የጤና ሚኒስቴር እና የኢትዮጵያ ህብረተሰብ ጤና ኢንስቲትዩት የወባ እና የኮሮና ቫይረስ ወረርሽኞችን ጨምሮ በዝንጀሮ ፈንጣጣ ዙሪያ መግለጫ ሰጥተዋል።

የኢትዮጵያ ህብረተሰብ ጤና ኢንስቲትዩት ዋና ስራ አስኪያጅ ዶ/ር መሳይ ኃይሉ እንዳሉት የዝንጀሮ ፈንጣጣ በኢትዮጵያ ከዚህ በፊት ተከስቶ ባያውቅም በሽታው ከዚህ በፊት ባልተከሰተባቸው ሀገራት በመከሰቱ ለኢትዮጵያም ስጋት ነው ብለዋል።

በሽታው ወደ ኢትዮጵያ እንዳይገባም በ20 የሀገሪቱ መግቢያ እና ሙውጫ በሮች ላይ ጥብቅ ክትትል እና ቁጥጥር እየተደረገ መሆኑን ዶ/ር መሳይ ገልጸዋል።

በሽታውን ለመለየት የሚያስችል በሀገር አቀፍ ደረጃ 50 የላብራቶሪ ማዕከላት ተደራጅተዋል ያሉት ዶክተር መሳይ በሽታውን መለየት የሚያስችል መመርመሪያ ኪት እና ተያያዥ ኬሚካሎች በማሟላት ላይ መሆናቸውንም አክለዋል።

ይሁንና በሽታውን መለየት የሚያስችሉ የላብራቶሪ ግብዓቶች በዓለም ላይ መመረት ቆመው ስለነበር ኢትዮጵያ በቀላሉ ለማግኘት ተቸግረን ነበር አሁን ላይ ግብዓቶቹ መመረት በመጀመራቸው ግዥውን ለመፈጸም ሂደቶችን በመጠናቀቅ ላይ እንገኛለንም ብለዋል ዶ/ር መሳይ፡፡

በበሽታው የተያዙ ሰዎች ቢገኙ የህክምና ክትትል ለማድረግ የሚችሉ ባለሙያዎች በመሰልጠን ላይ መሆናቸውንም ነው የተናገሩት፡፡

የዝንጀር ፈንጣጣ በሽታ ለመጀመሪያ ጊዜ የተከሰተው በፈረንጆቹ 1958 በዲሞክራቲክ ኮንጎ ነበር። በሽታው በያዝነው ዓመት ዳግም በ11 የአፍሪካ ሀገራት ተከስቶ እስካሁን 780 ሰዎችን ሲያጠቃ እስካሁን በበሽታው ተይዞ የሞተ ሰው የለም።

ይሁንና በዚህ በሽታ የተጠቃ ሰው ከ6 እስከ 11 በመቶ የመሞት እድል እንዳለውም በመግለጫው ላይ ተጠቅሷል።

የጤና ጥበቃ ሚኒስትር ዴኤታ ዶ/ር ደረጄ ድጉማ በበኩላቸው የወባ እና የኮሮና ቫይረስ ቫይረስ ወረርሽኝን የተመለከተ መግለጫ ሰጥተዋል፡፡

በደቡብ፣ በኦሮሚያ፣ በአማራ እና በደቡብ ምዕራብ ክልሎች ያለው የወባ ወረሽኝ ተጠቂዎች ቁጥር ካሳለፍነው ጥር ወር ወዲህ በፍጥነት እየጨመረ እንደሚገኝ ገልጸዋል፡፡

ለዚህ ዋነኛው ምክንያት ለወባ ትንኝ መራባት ምቹ የከባቢ አየር ሁኔታ መፈጠር፣ የጸጥታ ችግሮች እና የህብረተሰቡ ወባን ለመከላከል የሚውሉ ቁሳቁሶችን በአግባቡ አለመጠቀም ናቸው ያሉም ሲሆን ወረርሽኙን ለመከላከልና ጥብቅ የህክምና ክትትል ለማድረግ፣ የጸረ ወባ መድኃኒት እና አጎበር በመሰራጨት ላይ መሆኑን ተናግረዋል።

የኮሮና ቫይረስ ስርጭት ባለፉት አራት ሳምንታት እየጨመረ መጥቷልም ብለዋል ሚኒስትር ዴዔታው።

አሁን ላይ 14 ሰዎች በቫይረሱ ተጠቅተው በጽኑ ህክምና ክትትል ውስጥ ናቸው ያሉት ዶ/ር ደረጀ የቫይረሱ ስርጭት በዓለም አቀፍ እና በሀገራችን እየጨመረ በመሆኑ ህብረተሰቡ ጥንቃቄ እንዲያደርግም አሳስበዋል።