የሞሮኮ ብሔራዊ ቡድን ደቡብ ኮሪያን በማሸነፍ የመጀመሪያውን ድል ተቀዳጀ

ሞሮኮ በኳስ ደረጃ ከእስያዋ በ55 ደረጃዎች ዝቅ የምትል ቢሆንም የአፍሪካዋቷ ሞሮኮ ቡድን በተከላከያዋ ኢብቲሳም ጂሬዲ ጎል ድል ማድረግ ችሏል

በሴቶች የአለም ዋንጫ እየተሳተፈ ያለው የሞሮኮ ሴቶች ብሔራዊ ቡድን ደቡብ ኮሪያን በአስገራሚ ሁኔታ 1ለ 0 በማሸነፍ የመጀመሪያውን ድል መቀዳጀቱን ሮይተርስ ዘግቧል።

• "እዚህ የመጣነው ቁጥር ለማሟላት ሳይሆን ለመወዳደር ነው"- የሞሮኮ ሴቶች ብሔራዊ ቡድን

ሞሮኮ በኳስ ደረጃ ከእስያዋ በ55 ደረጃዎች ዝቅ የምትል ቢሆንም የአፍሪካዋቷ ሞሮኮ ቡድን በተከላከያዋ ኢብቲሳም ጂሬዲ ጎል ድል ማድረግ ችሏል።

ጂሪዲ "ድካማችን ፍሬ አፍርቷል። ድሉ የሞሮኮ እና የአረቦች ነው፤ ይህ የጠንካራ ስራችን ውጤት ነው"ስትል ተናግራለች።

ለመጀመሪያ ጊዜ በሴቶች የአለም ዋንጫ የተሳተፈው የሞሮኮ የሴቶች ቡድን  አሰልጣኝ ቸባክ ባለፈው "እዚህ የመጣነው ቁጥር ለማሟላት ሳይሆን ለመወዳደር ነው" ሲሉ ተናግረው ነበር።

አሰልጣኛ ይህን ያሉት ፍላጎታቸው ከተሳትፎ በላይ መሆኑን ለመግለጽ ነበር።

ይሁን እንጅ ሞሮኮ ከጀርመን ጋር ባደረገችው የመጀመሪያ ጨዋታ 6 ለ 0 በሆነ ሰፊ የጎል ልዩነት ነበር የተሸነፈችው።

በቅጽል ስሙ የአትላንቲስ አንበሶች የሚባለው የሞሮኮ ሴት ብሔራዊ ቡድን በፈረንጆቹ 2022 ነበር ወደ አለም ዋንጫ ውድድር ማለፉን ያረጋገጠው።

"ጥሩ ምስል ለማሳየት ትልቅ ኃላፊነት መሸከም እንዳለብን እና የሞሮኮ እግር ኳስ ቡድን ያሳየውን የመሻሻል ውጤት ማሳየት እንዳለብን ይሰማናል። ይህ ለእኛ ትልቅ ውጤት ነው።" ሲሉ ተናግረዋል አሰልጣኝ ቸባክ።

ኳስ በሚወደድባት ነገርግን ሴቶች ብዙም በማይሳተፉበት ሀገር በአፍሪካ የሴቶች ዋንጫ ላይ ያሳዩት ብቃት ስማቸውን ከፍ አድርጎታል።

ኖሀይላ ቤንዚና በትልልቅ የሴቶች ውድድር ሂጃብ በመልበስ የመጀመሪያዋ ተጫዋች ትሆናለች። ፊፋ በሀይማኖት ምክንያት ሴቶች የእራስ መሸፈኛ እንዲያደርጉ የፈቀደው በፈረንጆቹ 2014 ነበር።

የሞሮኮ የወንዶች ብሔራዊ ቡድን ኳታር በተካሄደው የአለም ዋንጫ ውድድር ሳይጠበቅ ትላልቅ ቡድኖችን በማሸነፍ ግማሽ ፍጻሜ በመድረሱ ከፍተኛ አድናቆት አትርፎ ነበር።