የኔቶ አባል ሀገራት በጦርነት እስቤ ውስጥ መዘጋጀት እንደሚኖርባቸው ዋና ጸሀፊው አሳሰቡ

አባል ሀገራቱ ከአመታዊ ሀገራዊ ጥቅል ምርታቸው 2 በመቶ የሚያዋጡት መዋጮ በቂ አለመሆኑንም ገልጸዋል

የሰሜን አትላንቲክ ቃልኪዳን ድርጅት ኔቶ ዋና ጸሀፊ ማርክ ሩት የድርጅቱ አባላት በጦርነት እስቤ ውስጥ መዘጋጀት እንደሚኖርባቸው አሳስበዋል፡፡

ዋና ጸሃፊው የህብረቱ አባላት ልክ በጦርነት ውስጥ እንዳሉ በመቁጠር የጦር መሳርያ ምርት እና የመከላከያ ወጪዎችን ሊያሳድጉ እንደሚገባ መክረዋል፡፡

ዜጎች ለዘላቂ የአውሮፓ ሰላም መስዕዋትነት መከፈል አለባቸው ያሉት ሩት ከጡረታ እና ከሌሎች ክፍያዎች ላይ በመቁረጥ መንግስታት የመከላከያ በጀታቸውን እንዲያሳድጉ መተባበር እንደሚኖርባቸው አሳስበዋል፡፡

• የኔቶ አባል ሀገራት ህዝባቸውን ለጦርነት በማዘጋጀት ላይ ናቸው

በአማካኝ የአውሮፓ ሀገራት ከአጠቃላይ ገቢያቸው አንድ አራተኛ የሚሆነውን ለጡረታ፣ በጤና እና በማህበራዊ ዋስትና ስርዓት ላይ ያውላሉ፡፡

ኔቶ አባል ሀገራቱ የመከላከያ ወጪያቸውን ለማሳደግ በማህበራዊ አገልግሎት ላይ የሚያወጡትን ወጪ እንዲቀንሱ እየጠየቀ ይገኛል፡፡

ዋና ጸሀፊው አክለውም ከሩስያ በኩል እየመጣ ያለውን የጦርነት ስጋት አባላቱ በበቂ አልተደሩትም በሚል ወቅሰዋል፡፡

 በአሁኑ ወቅት ከሀገራቱ አጠቃላይ ሀገራዊ ምርት እድገት 2 በመቶ የሚዋጣው ገንዘብ የወታደራዊ ህብረቱን ጠንካራ ቁመና እና የአህጉሩን ሰላም ለማስጠበቅ በቂ አይደለም ሲሉ ተናግረዋል፡፡

የቀድሞ የኔዘርላንድ ጠቅላይ ሚኒስትር የአሁኑ የኔቶ ዋና ጸሀፊ ወቅታዊ ሁኔታዎችን አስመልክቶ ባደረጉት ንግግር፤ “በጦርነት ውስጥ አይደለንም ግን ደግሞ በአካባቢያችንም ሰላም የለም” ብለዋል፡፡

በተጨማሪም "አሁን የምንገኝበት ሁኔታ ጥሩ ሊሆን ይችላል፤ ነገር ግን ከ2 በመቶ አመታዊ መዋጮ ጋር ተጣበቅን የምንቀጥል ከሆነ በአራት እና በአምስት አመታት ውስጥ ከሩሲያ እና በሌሎች የዓለም ክፍሎች ከሚከሰተው ከማንኛውም ሁኔታ ራሳችንን ለመከላከል በጣም ደካማ ልንሆን እንችላለን" ነው ያሉት፡፡

አለም እና እንደአጠቃላይ አህጉሩ የሚገኝበት ሁኔታ የሚያዘናጋ አይደለም ያሉት ዋና ጸሀፊው በቀዝቃዛው የአለም ጦርነት ወቅት አባል ሀገራቱ ከነበረው ስጋት አንጻር አመታዊ ወጪያቸውን አሳድገው እንደነበር አስታውሰዋል፡፡

ይህን ደግሞ አውሮፓ እና አሜሪካ በስጋትነት ከሳሏት ሩስያ ወታደራዊ በጀት አንጻር አወዳድረው ተመልክተውታል፡፡

ሞስኮ ከቀዝቃዝው ጦርነት ወዲህ ከፍተኛ የተባለውን ከአመታዊ በጀቷ ውስጥ አንድ ሶስተኛውን ለመከላከያዋ እንደበጀተች ይታወሳል በ2025 እና በቀጣዮቹ አመታት ደግሞ የአመታዊ ጥቅል ምርት እድገቷን 7 እና 8 በመቶ ድረስ መከላከያዋ ላይ ለማዋል አቅዳለች፡፡