ሳፋሪ ኮም ኢትዮጵያ ከነሀሴ ጀምሮ የቴሌኮም አገልግሎት መስጠት ሊጀምር መሆኑን አስታወቀ

እስከ ሚያዝያ 2015 ዓ.ም ድረስ ለ25 ከተሞች የቴሌኮም አገልግሎት ለመስጠት እቅድ ማስቀመጡን አስታውቋል

ሳፋሪ ኮም ኢትዮጵያ ከነሀሴ ጀምሮ የቴሌኮም አገልግሎት መስጠት ሊጀምር መሆኑን አስታወቀ።

የድርጅቱ የውጭ ጉዳዮች እና ቁጥጥር ሀላፊ ማቲው ሀሪሰን እንዳሉት ሳፋሪኮም ኢትዮጵያ ከአንድ ወር በኃላ የቴሌኮም አገልግሎት ለደንበኞች መስጠት ይጀምራል

• ሳፋሪኮም ኢትዮጵያ “ከሚያዝያ አንድ ጀምሮ አገልግሎት መስጠት እጀምራለሁ” አለ

ድርጅቱ የመጀመሪያ አገልግሎቱን በድሬዳዋ ከተማ የሚጀምር ሲሆን እስከሚቀጥለው ሚያዝያ 2015 ዓ.ም ድረስ ለ25 ከተሞች የቴሌኮም አገልግሎት ለመስጠት እቅድ ማስቀመጡን አስታውቋል።

ድርጅቱ ከዚህ በፊት የቴሌኮም አገልግሎቱን ሚያዝያ 1 ቀን 2014 ዓ.ም ለመስጠት እቅድ የነበረው ቢሆንም በተለያዩ ምክንያቶች ወደ ተግባር አለመግባቱን አስታውቋል።

ከኢትዮ ቴሌኮም ጋር የተጀመረው የቴሌኮም መሰረተ ልማት ኪራይ ዋጋ ላይ ከስምምነት አለመድረስ፣ የኔትወርክ ዝርጋታ እና ሌሎች መሰረተ ልማቶች ስራ በተያዘላቸው ጊዜ አለመጠናቀቅ እና ሌሎች ምክንያቶች ተቋሙ ባሰበው ጊዜ አገልግሎት ለመጀመር እንቅፋት እንደሆነበት ተገልጿል።

ሳፋሪ ኮም ኢትዮጵያ በ07 መነሻ መለያ ቁጥር አገልግሎት እንደሚሰጥ ከዚህ በፊት መናገሩ ይታወሳል።

የጽሁፍ አገልግሎት፣ የዳታ፣ የድምጽ በአገር ውስጥ እና አለም አቀፍ የቴሎኮም አገልግሎቶችን ይሰጣል ያሉት ቺፍ ኦፊሰሩ ከሰኔ በኋላ ደግሞ ሁሉንም የቴሌኮም አገልግሎቶችን መስጠት እንደሚጀምርም መግለጹ ይታወሳል።

• በኢትዮጵያ ከ126 ዓመታት በኋላ የመጀመሪያው የግል የቴሌኮም ፈቃድ ተሰጠ

እንዲሁም ድርጅቱ በአዲስ አበባ፣ አዳማ እና ድሬዳዋ ከተሞች የመረጃ ማዕከል መገንባቱ ያሳወቀ ሲሆን፤ እስካሁን ከአንድ ቢሊየን ዶላር በላይ በኢትዮጵያ ወጪ ማድረጉንም አስታውቋል።

በአጠቃላይ በቀጣዮቹ አምስት ዓመታት ውስጥ ከኢትዮጵያ አጠቃላይ የህዝብ ብዛት ውስጥ ለግማሹ ህዝብ የቴሌኮም አገልግሎት ለመስጠት እቅድ እንዳለው የገልጸው ሳፋሪኮም ኢትዮጵያ፤ በቀጣዮቹ አስር ዓመታት ውስጥ ደግሞ 98 በመቶ ለሚሆኑ ኢትዮጵያዊያን አገልግሎት የመስጠት እቅድ አለኝም ብሏል።