ፓኪስታን አሜሪካንን መምታት የሚችል ሚሳኤል እየሰራች ነው ተባለ

ፓኪስታን በበኩሏ የረጅም ርቀት ሚሳኤል የምታለማው ብሔራዊ ደህንነቷን ለማስከበር መሆኗን ገልጻለች

ፓኪስታን አሜሪካንን መምታት የሚችል ሚሳኤል እየሰራች ነው ተባለ፡፡

የእስያዋ ፓኪስታን የኑክሌር አረር ካላቸው የዓለማችን ሀገራት መካከል አንዷ ስትሆን ሕንድ ደግሞ ዋነኛ የደህንነት ስጋቷ እንደሆነች ስትናገር ይሰማል፡፡

ሁለቱ ሀገራት ሶስት ጊዜ ከባድ ጦርነት ያደረጉ ሲሆን አንዳቸው ሌላቸውን እንደ ዋነኛ የደህንነት ስጋት ምንጭ አድርገውም ይወስዳሉ፡፡

ሁለቱም ሀገራት የኑክሌር አረር የታጠቁ ሲሆን በተለይም ፓኪስታን እስካሁን የረጅም ርቀት ሚሳኤል አልነበራትም፡፡

ፓኪስታን የረጅም ርቀት ሚሳኤል ለመታጠቅ እየሰራች መሆኗን ተከትሎ ከአሜሪካ ጋር ግጭት ውስጥ እንድትገባ አድረጓታል፡፡

አሜሪካ ፓኪስታን የረጅም ርቀት ሚሳኤል ለመታጠቅ መፈለግን በስጋትነት ያየችው ሲሆን ከድርጊቷ እንድትታቀብ በተደጋጋሚ እንዳሳሰበች ተገልጿል፡፡

ይሁንና ኢስላማባድ የረጅም ርቀት ሚሳኤል ማልማቷን መቀጠሏን ተከትሎ ከሰሞኑ አዲስ ማዕቀብ በፓኪስታን ላይ ጥላለች፡፡

ሮይተርስ የአሜሪካ ውጭ ጉዳይ ሚኒስቴር ከፍተኛ ባለስልጣንን ጠቅሶ እንደዘገበው ከሆነ ፓኪስታን እያለማች ያለችው የረጅም ርቀት ሚሳኤል አሜሪካንን መምታት የሚችል ነው፡፡

አሜሪካ በሩሲያ፣ ሰሜን ኮሪያ እና ቻይና የረጅም ርቀት ሚሳኤል ስጋት ውስጥ ያለች ሲሆን ፓኪስታንም ይህን ሚሳኤል ከታጠቀች በአራተኛ ሀገር ስጋት ውስጥ ልትገባ ትችላለች ተብሏል፡፡

“የአሜሪካ መቃወሚያዎች የኦሬሽኒክ ሚሳኤልን መቋቋም የሚችሉበት አቅም ካላቸው መሞከር ይችላሉ” -ፑቲን

የፓኪስታን ባለስልጣናት በበኩላቸው የረጅም ርቀት ሚሳኤል መታጠቅ የፈለጉት ከህንድ ሊሰነዘር የሚችልን ስጋት ለመመከት እንደሆነ ተናግረዋል፡፡

አሜሪካ ደግሞ የፓኪታን ሚሳኤል ርቀት ከእስያ ሀገራት የዘለለ ሊሆን እንደማይገባ መናገሯን ተከትሎ አለመግባባቱ እንደተፈጠረም ተገልጿል፡፡

አሜሪካ ባልተጠበቀ መንገድ ጦሯን ከአፍጋኒስታን ካስወጣች በኋላ ከፓኪስታን ጋር ያላት ግንኙነት እየተሸረሸረ የመጣ ሲሆን በአንጻሩ ኢስላማባድ ከሩሲያ እና ቻይና ጋር የጠበቀ ወዳጅነት በመመስረት ላይ ትገኛለች፡፡