ኳታር በዶሃ የሚገኘውን የሀማስ ቢሮ ልትዘጋ እንደምትችል ተነገረ

ኳታር ከአሜሪካ መንግስት ጋር ባደረገችው ስምምነት ከ2012 ጀምሮ የሀማስ የፖለቲካ መሪዎች መቀመጫ ሆናለች

ኳታር በዶሃ የሚገኘውን የሀማስ ቢሮ ልትዘጋ እንደምትችል ተነገረ።

እስራኤል እና ሀማስን በማደራደር ሚናዋ እየጨመረ የመጣው ኳታር በዶሃ የሚገኘውን የሀማስ የፖለቲካ ቢሮ ልትዘጋ እንደምትችል ሮይተርስ ለኳታር መንግስት ግምገማ ቅርበት ያላቸውን ባለስጣን ጠቅሶ ዘግቧል።

ኳታር፣ የሀማስ የፖለቲካ ቢሮ በዶሃ ስራውን እንዲቀጥል ስለመፍቀድ እና የማደራደር ሚናዋን ስለማቆም ወይም ስላለመቀጠል ጉዳይ ስትገመግም እንደነበር ባለስልጣኑ ተናግረዋል።

• ሀማስ 33 የእስራኤል ታጋቾችን ለመልቀቅ መስማማቱ ተሰማ
• ከሃማስ ጋር ተኩስ ለማቋም ብንስማማም በራፋህ የምድር ውጊያ መጀመራችን አይቀሬ ነው - ኔታንያሁ

ሀገሪቱ ድርድሩ የፖለቲካ ነጥብ ለማስቆጠር በሚጥሩ ፖለቲከኞች ችግር ውስጥ መግባቱን በመግለጽ የቀጥተኛ አደራዳሪነት ሚናዋን እንደምታጤነው ገልጻ ነበር።

ባለስልጣኑ "ኳታር ማደራደሯን ካቆመች፣ የፖለቲካ ቢሮው በመኖሩ የሚያገኙት ነጥብ የለም" ማለታቸውን ዘገባው ጠቅሷል።

ኳታር የቡድኑን ቢሮ ለመዝጋት ውሳኔ ላይ ከደረሰች ሀማስ ለቆ እንዲወጣ ስመጠየቁ ባለስልጣኑ እንደማያውቁ ተናግረዋል። ይሁን እንጅ ባለስልጣኑ እንዳሉት የኳታር ውሳኔ እየተካደ ባለው ድርድር ሀማስ እና እስራኤል በሚያሳዩት ተግባር ይወሰናል ብለዋል።

ዋሽንግተን ፖስት አንድ ስሙ እንዲጠቀስ ያልፈለገ ባለስልጣንን ጠቅሶ አርብ እለት ባወጣው ዘገባ አሜሪካ ቡድኑ ከእስራኤል ጋር የተኩስ አቁም ስምምነት ለመድረስ የሚደረገውን ድርድር ውድቅ ማድረጉን ከቀጠለ፣ ዶሃ ሀማስን እንድታባርረው ነግራታለች።

የሀማስ ተደራዳሪዎች ታጋቾችን እንዲለቀቁ ያስችላል ለተባለ የተኩስ አቁም ድርድር በትናንትናው እለት ካይሮ ገብተው እየተደራደሩ ነው። በድርድሩ ሀማስ 33 ታጋቾችን ለመልቀቅ ተስማምቷል ተብሏል።

የሀማስ የፖለቲካ መራዎች

ኳታር ከአሜሪካ መንግስት ጋር ባደረገችው ስምምነት ከ2012 ጀምሮ የሀማስ የፖለቲካ መሪዎች መቀመጫ ሆናለች።

የቡድኑ መሪ እስማኤል ሀኒየህ በኳታር ዶሃ የሚኖር ሲሆን ሀማስ በደቡብ እስራኤል ከባድ ጥቃት ካደረሰበት ከጥቅምት ሰባት ወዲህ ቱርክን ጨምሮ ወደ ተለያዩ ሀገራት ተጋጋሚ የውጭ ጉዞ አድርጓል። ዋሽንግተን ዋነኛ አጋራ አድርጋ የምታያት የገልፍ ሀገሯ ኳታር፣ ከጥቅምት ሰባቱ ጥቃት ወዲህ ከአሜሪካ እና እስራኤል ከፍተኛ ትችት እያስናገደች ነው።

ሀማስ በጥቅምት ሰባቱ ጥቃት 1200 ሰዎችን መግደሉን እና ሌሎች 253 ሰዎች አግቶ መውሰዱን ተከትሎ እስራኤል እየወሰደች ባለው የአጸፋ ጥቃት እስካሁን ከ34ሺ በላይ ፍልስጤማውያን መገደላቸውን የጋዜ ጤና ባለስጣናት ተናግረዋል።