አሜሪካ በቤተሙከራ ገዳይ የሆነ አዲስ የኮሮና ቫይረስ ዝርያ መስራቷን ሩሲያ ገለጸች

አዲሱ የኮቪድ ዝርያ በእንስሳት ላይ ተሞክሮ 80 በመቶ ገዳይ ቫይረስ ሲሆን አሁን ባሉት ክትባት መከላከል አይቻልም ተብሏል

አሜሪካ በቤተሙከራ አዲስ የኮሮና ቫይረስ ዝርያ መስራቷ ተገለጸ።

የኮሮና ቫይረስ ከተከሰተ ሶስተኛ ዓመት ሊሞላው ጥቂት ቀናት የቀረው ሲሆን እስካሁን ቫይረሱ በየጊዜው ራሱን በመቀያየር ከአራት በላይ የኮቪድ ዝርያዎች መገኘታቸው ይታወሳል።

የሩሲያ መከላከያ ባወጣው መግለጫ አሜሪካ ሰው ሰራሽ የኮሮና ቫይረስ ተዋህሲያን መፍጠሯን አስታውቋል።

• ኦሚክሮን የተሰኘው አዲሱ የኮሮና ቫይረስ ዝርያ መዛመቱን ቀጥሏል
• የኮሮና ቫይረስ የስርጭት መጠን በመላው ዓለም እየቀነሰ ነው

በቻይና ዊሃን የተከሰተው እና ኦሚክሮን የተሰኘውን የኮሮና ቫይረስ ልውጥ ዝርያን መሰረት ተደርጎ የተሰራው ይህ አዲስ የኮቪድ ዝርያ በእንስሳት ላይ ተሞክሮ 80 በመቶ ገዳይ እንደሆነ ተገልጿል።

በሩሲያ መከላከያ ሚኒስቴር የኬሚካል እና ባዮሎጂካል መከላከያ ክፍል ሀላፊ የሆኑት ኢጎር ኪሪሎቭ በሰጡት መግለጫ በአሜሪካ የተሰራው ልውጥ ኮሮና ቫይረስ በእንስሳት ላይ ተክክሮ ሳንባን እና ሌሎች የሰውነት ክፍሎችን በመጉዳት ለሞት የሚዳርግ አደገኛ ገዳይ ቫይረስ መሆኑ ተረጋግጧል ብለዋል።

አዲሱ ቫይረስ ከዚህ በተጨማሪም አሁን በምርት እና አገልግሎት ላይ ያሉት የክትባት አይነቶች እንደማያድኑትም ሃላፊው አክለዋል።

እንደ ሃላፊው ገለጻ ይህ አሜሪካ ሰራሽ ቫይረስ በቦስተን ዩንቨርሲቱ የተሰራ ሲሆን የቫይረሱ ጎጂነት ከአሜሪካ ውጪ በሆኑ ሶስተኛ ሀገር ውስጥ መሞከራቸውንም ተናግረዋል።

ይህ ሰው ሰራሽ የኮሮና ቫይረስ ዝርያ የአሜሪካ የባዮሎጂካል ጦር መሳሪያ አንድ አካል መሆኑን የገለጹት ሃላፊው ቫይረሱ እንዲለማ የተደረገው እና ሙከራ የተደረገው ዜጎችን ለአደጋ በሚያጋልጥ መልኩ መሆኑንም አክለዋል።

አሜሪካ እስካሁን በሩሲያ ስለቀረበባት ክስ ምላሽ አልሰጠችም።

ሩሲያ በቀጣይ በሚደረጉ የባዮሎጂካል ጦርነት ስምምነት ጉባኤ ላይ መሰል ጉዳቶች እንዳይከሰቱ እና መከላከል በሚቻልባቸው መንገዶች ዙሪያ እንደምትሰራ አስታውቃለች።

የኮሮና ቫይረስ በዓለም ላይ ከ646 ሚሊዮን በላይ ዜጎችን ያጠቃ ሲሆን ከ6 ነጥብ 6 ሚሊዮን በላይ ዜጎችን ደግሞ እንደገደለ የዓለም ጤና ድርጅት መረጃ ያስረዳል።

የቫይረሱ ስርጭት እና ጉዳት በየጊዜው እየቀነሰ እየመጣ ሲሆን ከቅርብ ጊዜ ጀምሮ ደግሞ በተለይም በቻይና በቫይረሱ የሚያዙ እና የሚሞቱ ዜጎች ቁጥር እየጨመረ ይገኛል።