በሩሲያ ከራዳር ተሰውራ የጠፋችው አውሮፕላን ተገኘች፤ተሳፋሪዎቹም በህይወት ተርፈዋል

የሩሲያ ባለስልጣናት የጠፋችውን አውሮፕላን ለመፈለግ ሁለት ሄሊኮፕተሮች ማሰማራታቸውን ገልጸው ነበር

በሩሲያ 19 ሰዎችን አሳፍራ የነበረችውና ከራዳር እይታ ውጭ የሆነችው ኤኤን-28 አውሮፕላን በአስቸጋሪ ሁኔታ ውስጥ አርፋለች፤ ተሳፋሪዎቹም በህይወት ተርፈዋል፡፡

ኤኤን-28/ An-28 የተሰኘች አንቶኖቭ አውፕላን ከራዳር ውጭ በመሆን ሳይቤሪያ ቶምስክ ግዛት እንደተሰወረች የግዛቱ ባለስልጣናት ገልጸው ነበር፡፡

የግዘቱ አስተዳዳሪ ሰርጌይ ዜቫችኪን እንዳሉት ከሆነ የጠፋችውን አውሮፕላን ለመፈለግ ሁለት ሄሊኮፕተሮች እንዲሰማሩ ተደርገዋል፡፡ ሲላ /SiLA/ የተባለውን በሳይቤሪያ አየር ክልል የሚንቀሳቀስ አየር መንገድ ንብረት የሆነችው አውሮፕላኗ፤ በውስጧ ከነበሩ 17 መንገደኞች በተጨማሪ 3 የአውሮፕላኗ ሰራተኞች እንደነበሩ አስተዳዳሪው አስታውቀዋል፡፡

በሩስያ አውሮፕላን ከራዳር ውጭ ሆና ስትጠፋ በዚህ ወር ለሁለተኛ ጊዜ መሆኑንም ነው ሮይተርስ ዘገቧል፡፡

ከሁለት ሳምነታት በፊት An-26 የተሰኘች አውሮፕላን ከእይታ ውጭ ተሰውራ በሩስያ ሩቅ ምስራቅ አቅጣጫ በሚገኝ ካምቻትካ ግዛት ውስጥ ተከስክሳ የ28 ሰዎች ህይወት ማለፉ የሚታወስ ነው፡፡

እንደፈረንጆቹ 2012 An-28 የተሰኘች ተመሳሳይ አውሮፕላን በካምቻታካ ደኖች ወድቃ 10 ሰዎች መሞታቸውንም እንዲሁ የሚታወስ ነው፡፡ ከቅርብ ዓመታት ወዲህ የሩሲያ የአቪዬሽን ደህንነት ደረጃዎች እየተሻሻለ መምጣቱ ቢነገረም አልፎ አልፎ መሰል አደጋዎች ማጋጠሙ አልቀረም፡፡