የባለትዳሮችን ግንኙነት የሚያጠናክሩ ስምንት ነጥቦች

ባህላዊና ሀይማኖታዊ ሁነቶች ላይ በጋራ መታደምና ስፖርታዊ እንቅስቃሴዎችንም በጋራ ማድረግም ተመክሯል

በፍቅር ጓደኝነት የተጀመረ ወዳጅነት ወደ ትዳር ከፍ ሲል ተቋማዊ መልክን ይይዛል፡፡

በዚህ ጊዜ በሁለት ጥንዶች መካከል ከህይወት ውጣ ውረድ ፣ ከልማድ ፣ ከፍላጎት መለያየት እና ከሌሎችም ምክንያቶች የተነሳ ጥል እና መጨቃጨቅ ይከሰታል፡፡

 ከዚህ በታች የተዘረዘሩት ቀላል እና ውጤታማ ልማዶች ታዲያ በትዳር አጋሮች መካከል ያለውን ግንኙነት ለማጠናከር እንደሚያግዙ ባለሙያዎች ይመክራሉ።

1.የጋራ ፍላጎቶችን መፍጠር

 ሴት እና ወንድ ከተፍጥሮ እና ከአካባቢያዊ ሁኔታዎች መነሻ ፍላጎቶቻቸው የተለያየ እንደሆነ ይነገራል፡፡ 

ሁለቱ ጾታዎች ለመዝናናት እንዲሁም ጊዜ ለማሳለፍ የሚመርጧቸው እንቅስቃሴዎች እና ቦታዎችም ለየቅል ናቸው።

በዚህ የተነሳም አንዱ የራሱን ፍላጎት ለመፈጸም በሚሄድበት ርቀት አብረው የሚያሳልፉት ጊዜ እየቀነሰ በመካከላቸውም ክፍተት ይፈጠራል፡፡

• ጋብቻ ከመመስረትዎ በፊት ሊያስቡባቸው የሚገቡ ጉዳዮች ምን ምን ናቸው?

ይህን ለመከላከል ባለትዳሮች በጋራ የሚዝናኑባቸውን እና አብረው ጊዜ የሚያሳልፉባቸውን ለሁለቱም ተስማሚ የሆኑ ሁነቶችን ሊፈጥሩ ይገባል፡፡

 እነዚህ ተደጋጋሚ ልማዶች ጤናማ እና ደስተኛ ግንኙነት ለመገንባት አስተዋፅኦ ያደርጋሉ፤ በተጨማሪም የመተዋወቅ እና ስሜትን የመጋራት ሁኔታን ይፈጥራሉ፡፡

2. አብሮ መመገብ

ማዕድ መጋራት ወይም አብሮ መመገብ ምንም እንኳን ቀላል ነገር ቢመስልም በቀን ቢያንስ አንድ ጊዜ በጋራ ገበታ ላይ መቀመጥ የባለትዳሮችን አብሮነት ከፍ የሚያደርግ ነው፡፡ 

ምንም እንኳን በቀን ውስጥ ሁሉንም ሰአት አብሮ መመገብ የማይቻል ቢሆንም በተገኘው አጋጣሚ በምግብ ዙርያ የሚወሩ ወሬዎች ስለ ቀን ውሎ ለመነጋገርና ሀሳብ አሰተያየት ለመጋራት እድል ይሰጣሉ።

3.ከዘመድ እና ወዳጅ ጋር በቤት ውስጥ አብሮ ማሳለፍ

በተቻለ አቅም ከቤተሰብ እና ከጓደኛ ጋር የጋራ ጊዜን ማሳለፍ፣ የህይወትን አጋጣሚዎች፣ በጋራ ማጣጣም እና ማክበር ቢቻል በጥንዶች መካከል የእኔነት ስሜትን ይፈጥራል ተብሏል፡፡

እንደ ባልና ሚስት የመግባባት ስሜት ከማሳደጉም ባለፈ ከጓደኞች እና ቤተሰብ ጋር ጊዜ ማሳለፍ ውብ ትውስታዎችን በመፍጠር ግንኙነቱን ያጠናክራል፡፡

4. ከግጭት በኋላ ስሜትን መገላለጽ

በጥንዶች መካከል መዋደድ እና መፋቀር እንዲሁም ጥሩ ጊዜዎች እንዳሉ ሁሉ መጣላት ፣ መጨቃጨቅ ፣ በሀሳቦች ያለመስማማትም በግንኙነት ውስጥ የሚያጋጥም ነው፡፡

ግጭት ተፈጥሯዊ ቢሆንም ጥሉን ለመፍታት ሰዎች የሚከተሉት መንገድ ጤናማነት ግንኙነቱን ለማስቀጠል እና መግባባትን ለመፍጠር ወሳኝ ነው፡፡

ለዚህም ግጭቱን ስለፈጠረው ምክንያት በእርጋታ መመካከር ስለመፍትሄው መወያየት እና ከማንኛውም አለመግባባት በኋላ ሁለቱም ወገኖች ይቅርታ በመጠየቅ ህይወታቸውን ሊቀጥሉ ይገባል፡፡

ባህላዊ እና ሀይማኖታዊ ሁነቶች ላይ በጋራ መታደም ፣ የስፖርት እና የዳንስ እንቅስቃሴዎችን ማድረግ ፣ ስነጥበባዊ በሆኑ ጉዳዮች ላይ ልምድን ማዳበር ተጨማሪ የባለትዳሮችን ጥምረት ለማጠናከር ይረዳሉ ተብለው ከተጠቀሱ ነጥቦች መካከል ናቸው፡፡