የሱዳን ወታደራዊ አመራሮች በከሸፈው መፈንቅለ መንግስት ዙሪያ የሲቪል አስተዳድር ፖለቲከኞችን ወቀሱ

ወታደራዊ አመራሮቹ ለሱዳን አብዮት ለከፈሉት መስዋዕትነት ምስጋና አልሰተጠንም በማለት ላይ ናቸው

የሱዳን ወታደራዊ አመራሮች በከሸፈው መፈንቅለ መንግስት ዙሪያ የሲቪል አስተዳድር ፖለቲከኞችን መውቀሳቸው ተሰምቷል።

ከትናንት በስቲያ በሱዳን በሜጀር ጄኔራል አብደል ባቂ በክራዊ የተመራ ነው የተባለ የመፈንቅለ መንግስት ሙከራ መክሸፉ አይዘነጋም።

የሱዳን ጠቅላይ ሚኒስትር አብደላ ሃምዶክ የመፈንቅለ መንግስት ሙከራው በጦር ኃይሉ የውስጥ እና የውጭ አካላት የተቀናበረ መሆኑን ዘግይተው በሰጡት መግለጫ ተናግረው ነበር።

• “የግልበጣ ሙከራው በጦር ኃይሉ የውስጥ እና የውጭ አካላት የተቀናበረ ነው”- ጠ/ሚ አብደላ ሃምዶክ
• የሱዳኑ የመፈንቅለ መንግስት ሙከራ በሜ/ጄ አብደል ባቂ በክራዊ የተመራ ነው ተባለ

ሃምዶክ “የሽግግር ሂደቱን ለመጠበቅ አፋጣኝ እርምጃዎችን እንወስዳለን፤ የሽግግር መንግስቱም ሊጠበቅ ይገባዋል”ሲሉም በወቅቱ በሰጡት መግለጫቸው ገልጸዋል።

ይሁንና የሱዳን ሉዓላዊ የሽግግር ምክር ቤት ፕሬዝዳንት እና የጦር ኃይሎች ጠቅላይ አዛዥ ሌተናል ጄኔራል አብዱል ፈታህ አል ቡርሃን በሰጡት መግለጫ የሰቪል አስተዳድር ፖለቲከኞች ለመፈንቅለ መንግስት ሙከራው ምክንያት ናቸው ብለዋል።

አልቡርሀን እንደተናገሩት “የሲቪል አስተዳድር ፖለቲከኞች ለግል ጥቅማቸው ሲሉ የሱዳናዊያንን አብዮት ዓላማ መጉዳት ፈልገዋል” ብለዋል።

“እነዚህ ፖለቲከኞች የሱዳን ጦር አምባገነኑን የአልበሽር ስርዓት በመገርሰስ የከፈለውን መስዋዕት ረስተው ጦሩን ማናናቃቸው መፈንቅለ መንግስት እንዲፈጸም በር ከፍተዋል” ያሉት ደግሞ የሱዳን ጦር ሀይሎች ምከትል አዛዡ አህመት ዳጋሉ የሲቪል አስተዳድሩን ተችተዋል።

• “ሱዳንን ለማሸነፍ የሚችል ኃይል የለም”- አል ቡርሃን
• የቤጃ ጎሳ አባላት ባነሱት ተቃውሞ ካርቱምን ከሀገሪቱ ወደቦች የሚያገናኘውን መንገድ ዘጉ

በመፈንቅለ መንግስት ሙከራው ተሳትፈዋል በሚል ተጠርጥረው በቁጥጥር ስር የዋሉ የጦሩ አባላት ቁጥር ከ20 በላይ መሆኑ ተገልጿል።

ሳውዲ አረቢያ እና ግብጽ በሱዳን የመፈንቅለ መንግስት ሙከራውን ቀድመው በውጭ ጉዳይ ሚኒስትሮቻቸው በኩል ያወገዙ አገራት ናቸው።

የደቡብ ሱዳን መንግስትም በትናትናው እለት ባወጣው መግለጫ ሙከራው እንዳሳዘነው በመግለፅ፤ ከሱዳን ህዝብ እና መንግስት ጎን ነን ብሏል።