የሶሪያ ፕሬዝዳንት በሽር አል አሳድ ወዴት ተሰደዱ? የሚለው ለበርካቶች ጥያቄ ሆኖ ቆይቷል
የሶሪያው ፕሬዝዳንት በሽል አል አሳድ ሰልጣን ከለቀቁ በኋላ ወደ ሩሲያዋ መዲና ሞስኮ መኮብለላቸውን አዲስ የወጡ መረጃዎች አመላከተዋል።
በሽር አል አሳድ ስልጣናቸውን ለቀው ከደማስቆ ከወጡ በኋላ ወዴት ተሰደዱ? የሚለው ለበርካቶች ጥያቄ ሆኖ ቆይቷል።
የሶሪያው ፕሬዝዳንት በሽል አል አሳድ እና ቤተሰቦቻቸው ሞስኮ ውስጥ እንደሚገኙ የሩሲያው የዜና ምንጭ ታስ የክሬምሊን ምንጮችን ዋቢ አድርጎ ዘግቧል።
ሩሲያ ለበሽር አል አሳድ እና ለቤተሰቦቻቸው ጥገኝት መስጠቷንም ነው ታስ በዘገባው ያመለከተው።
የሩሲያ የውጭ ጉዳይ ሚኒስቴር ከሰዓታት በፊት በሰጠው መግለጫ፤ ከስልጣን የተነሱት የሶሪያው ፕሬዝዳንት ባሻር አል አሳድ “ከሌሎች የትጥቅ ትግል ተሳታፊዎች" ጋር በተደረገ ድርድር ስራቸውን እና ሀገራቸውን መልቀቃቸውን እና ሰላማዊ የስልጣን ሽግግር እንዲደረግ መመሪያ መስጠታቸውን አስታውቋል።
በነዚህ ድርድሮች ላይ ሩሲያ እንዳልተሳተፈች ያስታወቀው ሚኒስቴሩ፤ በሶሪያ የሚገኙ የሩሲያ ወታደራዊ ሰፈሮች በተጠንቀቅ ላይ እንደሆኑ እና አአሁን ላይ የተደቀነባቸው ስጋት እንደሌለም አስታውቋል።
ሩሲያ የበሽር አል አሳድ ቁልፍ አጋር ነበረች ሲሆን፤ ከዚህ ቀደም ፕሬዝዳንቱ በስልጣን ላይ እንዲቆዩ ወታደራዊ ድጋፍ ስትሰጥ እንደቆየች ይታወቃል።
ለ24 ዓመታት የዘለቀው የበሽር አል አሳድ አገዛዝ ማብቃቱን የሶሪያ ጦር አዛዥ ለሀገሪቱ ጦር አመራሮች ማሳወቃቸው ሮይተረስ ምንጮች ጠቅሶ መዘገቡ ይታወቃል።
ሶሪያን ለ24 ዓመታት የገዙት ፕሬዝዳንት በሽር አል አሳድ ዛሬ ማለዳ ላይ አውሮፕላን ተሳፍረው ስፍራው ለጊዜው ወዳልታወቀ ቦታ መኮብለላቸውም ነው የተገለጸው።
ከኢድሊብ የተነሳው ሃያት ታህሪር አል-ሻም አማጺ ቡድን ባለፉት ቀናት በአላሳድ ጦር ላይ በከፈተው ጥቃት፥ አሌፖ፣ ሃማ እና ሆምስ የተሰኙ ቁልፍ ከተሞችን መቆጣጠሩ ይታወሳል።
የአማጺ ቡድኑ ግስጋሴውን በመቀጠልም ነው በዛሬው እለት የሶሪያ ርዕሰ መዲናዋን ደማስቆ ከአላሳድ አገዛዝ ነጻ ማውጣቱን ያስታወቀው።
ይህንን ተከትሎም 53 ለሚያህሉ ዓመታት ዘልቆ የቆየው የአባትና ልጅ የአገዛዝ ዘመን ማብቃቱ ነው የተነገረው።
የፕሬዝዳንት በሽል አል አሳድ አባት የሆኑት ሃፌዝ አል አሳድ ሶሪያን ከፈረንጆቹ 1971 አስከ 2000 ድረስ በፕሬዝዳትነት መርተዋል።
ልጃቸው በሽር አላሳድ ደግሞ ከፈረንጆቹ 2000 ጀምሮ ሀገሪቱን በፕሬዝዳንትነት እየመሩ ዘልቀዋል።
