ስያሜው የተቀየረው የኢትዮጵያ ፕሪሚየር ሊግ ዛሬ ተጀምሯል

ዛሬ በተካሔደ የሊጉ መክፈቻ ጨዋታ ሰበታ እና ድሬ ዳዋ 0 ለ 0 ሲለያዩ ከሰዓት ቅ/ጊዮርጊስ ከ ፋሲል ይገናኛል

ዛሬ የተጀምረው ቤትኪንግ የኢትዮጵያ ፕሪምየር ሊግ ጨዋታዎችን በቀጥታ ስርጭት የሚያስተላልፈው ዲኤስቲቪ በሰበታ እና ድሬ ዳዋ ከተማ ጨዋታ ስርጭቱን ጀምሯል፡፡

በርከት ያሉ ትሩፋቶችን ለኢትዮጵያ እግርኳስ ይዞ የመጣው የ2013 ቤትኪንግ የኢትዮጵያ ፕሪምየር ሊግ ውድድር ዛሬ ታኅሣሥ 3 ቀን በሚደረጉ ሁለት ጨዋታዎች ይከፈታል፡፡

በአዲስ አበባ ስታዲየም የተካሔደው የሰበታ እና የድሬ ዳዋ ጨዋታ 0 ለ 0 ተጠናቋል፡፡ ከሰዓት 9፡00 ላይ ደግሞ ቅዱስ ጊዮርጊስ ከ ፋሲል ከነማ ይጫወታል፡፡

ከሶከር ኢትዮጵያ በገኘነው መረጃ መሠረት፡

* ጨዋታዎችን ለመከታተል የሚፈልጉ የስፖርት ቤተሰቦች በዲኤስቲቪ ሱፐር ስፖርት ቻናል ቁጥር 229 በቀጥታ ያገኙታል።

* ጨዋታውን በቀጥታ ለማስተላለፍ የሚረዱ ሁለት የማሰራጫ ጣቢያ መኪናዎች ከኬንያ በመምጣት በአዲስ አበባ ስታዲየም ይገኛሉ።

* ከስድስት እስከ ስምንት ዘመናዊ ካሜራዎች በተለያዩ የስታዲየሙ ክፍሎች ጨዋታውን ለማስተላለፍ የሚቀመጡ ይሆናል።

* ሱፐር ስፖርት በቀጥታ ስርጭቱ በኮሜንታተርነት እና በጨዋታ ተንታኝነት ኢትዮጵያውያን ጋዜጠኞችን ይጠቀማል። እነርሱም ሰዒድ ኪያር፣ ዮናስ አዘዘ፣ መኳንንት በርሄ፣ ፋሲል ረዲ፣ ሶፎንያስ እንየው፣ ግርማቸው እንየው፣ ማርቆስ ኤልያስ እና ኃይለእግዚአብሔር አድሀኖም ሲሆኑ ከዚህ በተጨማሪ በጨዋታ ተንታኝነት የቀድሞ ተጫዋቾች አዳነ ግርማ፣ ሙሉዓለም ረጋሳ፣ ጌታቸው ካሳ (ቡቡ) እና ግሩም ሥዩም የሚሳተፉ ይሆናሉ።

* 60 ጨዋታዎች በአጠቃላይ እንደሚተላለፉ የተገለጸ ሲሆን የሚተላለፉት የትኞቹ 60 ጨዋታዎች ናቸው የሚለው እና ሙሉ መርሐግብሩም ባይታወቅም የመጀመርያው ሳምንት ሁሉም ስድስት ጨዋታዎች የቀጥታ ስርጭት የሚያገኙ ይሆናል።