በአሜሪካ አገልግሎቱን ያቆመው ቲክቶክ በአዲሱ የትራምፕ አስተዳደር የመመለስ ተስፋ እንዳለው ገለጸ

አሜሪካ ቲክቶክ መረጃ ለቻይና አሳልፎ በመስጠት የብሔራዊ ደህንነት ስጋት እንደደቀነባት በመግለጽ ነው እንዲሸጥ ወይም እንዲታገድ የወሰነችው

በአሜሪካ አገልግሎቱን ያቆመው ቲክቶክ በአዲሱ የትራምፕ አስተዳደር ተስፋ እንዳለው ገለጸ።

ቲክቶክ በአሜሪካ አገልግሎት እንዳይሰጥ የሚያግደው ህግ በዛሬው እለት ተግባራዊ ከመሆኑ ቀደም ብሎ ቅዳሜ ምሽት ጀምሮ አገልግሎቱን ያቋረጠ ሲሆን ከአፕል እና ጉግል አፕ ስቶሮች ወርዷል። 

ተመራጩ የአሜሪካ ፕሬዝደንት ዶናልድ ትራምፕ በነገው እለት በዓለ ሲመታቸው ከፈጸሙ በኋላ ቲክቶክ ሳይታገድ ለ 90 ቀናት እንዲቆይ ሊያደርጉ እንደሚችሉ ተናግረዋል። ቲክቶክም በትራምፕ ንግግር የመመለስ ተስፋ እንዳለው በመተግበሪያው ላይ ለተጠቃሚዎች ባስቀመጠው መልእክት ጠቅሷል።

ንብረትነቱ የቻይናው ባይቲዳንስ የሆነው ቲክ ቶክ በመጨረሻው ሰአት ለተጠቃሚዎቹ ባስቀመጠው መልእክት "ቲክ ቶክን የሚያግደው ህግ በአሜሪካ ጸድቋል። ይህ ማለት እንዳለመታል ሆኖ ከአሁን በኋላ ቲክቶክን መጠቀም አትችሉም ማለት ነው። ፕሬዝደንት ትራምፕ ቢሮ ሲገቡ ቲክቶክን እንደሚመልሱ በማመላከታቸው እድለኞች ነን። ነቅታችሁ ጠብቁን" ብሏል።

የቪዲዮ አርትኦት መስሪያው ካፕከትና ሌሞን8 ጨምሮ ሌሎች የባይቲዳንስ መተግበሪያዎች ከቅዳሜ ምሽት ጀምሮ አሜሪካ ውስጥ ከአፕስቶር ወርደዋል።

"የ90 ቀናት ማራዘሚያው ሊሆን የሚችል ጉዳይ ነው፤ ምክንያቱም ተገቢ ነው" ሲሉ ትራምፕ ሀየአሜሪካው ኤንቢሲ ቴሌቪዥን ተናግረዋል።"ያን የምወስን ከሆነ ሰኞ የማሳውቅ ይሆናል።"

ግማሽ ያህሉን አሜሪካውያንን የማረከው፣ ትንንሽ ንግዶችን ያነቃቃው እና የኦንላይን ገበያን ያቀላጠፈው ቲክ ቶክ የባይደን አስተዳደር አፕል እና ጉግል የመሳሰሉት ኩባንያዎቹ እገዳው ተግባራዊ ሲሆን እርምጃ እንደማይወስድባቸው ካላረጋገጠ በዛሬው እለት እንደሚዘጋ ያስጠነቀቀው ባለፈው አርብ እለት ነበር።

ባለፈው አመት በጸደቀው ህግ እና ጠቅላይ ፍርድ ቤት ባለፈው አርብ እለት በሙሉ ድምጽ ባጸደቀው ውሳኔ መሰረት ቲክ ቶክ እስከ ዛሬ ድረስ ከቻይናው ባይቲዳንስ ጋር ያለውን ግንኙነት እንዲያቋርጥ ወይም በአሜሪካ ውስጥ ያለውን አገልግሎት እንዲዘጋ ይገደዳል።

አሜሪካ ቲክቶክ መረጃ ለቻይና አሳልፎ በመስጠት የብሔራዊ ደህንነት ስጋት እንደደቀነባት በመግለጽ ነው እንዲሸጥ ወይም እንዲታገድ ውሳኔ ያሳለፈችው።

ኃይት ሀውስ በትናንትናው እለት ባወጣው መግለጫ እርምጃ መውሰድ የአዲሱ አስተዳደር ድርሻ ነው ብሏል።