ቲክቶክ ለወደድነው ቪዲዮ ገንዘብ ቲፕ የምናደርግበት አማራጭ እየሞከረ መሆኑን አስታወቀ

“ቲፕ (tips)” የሚል አማራጭ የሚመጣው አዲሱ አገልግሎት 5፣ 10 እና 15 ዶላር ቲፕ ማደረግ ያስችላል

የአጫጭር ተንቀሳቃሽ ምስሎች (ቪዲዮዎች) ማጋሪያ የሆነው ቲክቶክ በርካታ ተጠቃሚዎችን እያፈሩ ካሉ የማህበራዊ ትስስር ገጾች ውስጥ አንዱ እየሆነ መጥቷል።

ታዲያ ይህ የማህበራዊ ትስስር ገፅ አዲስ አገልግሎት ለማቅረብ በሙከራ ደረጃ እየሰራ መሆኑን ዘ ቨርጅ የተባለው ድረ ገፅ አስነብቧል።

አዲሱ የቲክቶክ አገልግሎትም በማህበራዊ ትስስሩ ላይ ተጭነው ለወደድነው ምስል ጉርሻ ገንዘብ (ቲፕ) ለመስጠት የሚያስችል መሆኑም ነው የተነገረው።

በቲክቶክ ላይ በጉርሻ መልክ (ቲፕ) የተሰጠው ገንዘብ ሳይቆራረጥ ለባለ ተንቀሳቃሽ ምስሉ (ቪዲዮ ባለቤት) የሚደርስ መሆኑም ነው የተሰማው።

ለዚህም የሚሆን በቲክቶክ ገፅ ላይ “ቲፕ (tips)” የሚል አማራጭ የሚመጣ ሲሆን፤ ቲፕ ለሚሰጡ ሰዎችም የ5፣ 10 እና 15 የአሜሪካ ዶላር ቲፕ ማድረጊያ አማራጮች መቅረባቸውም ተነግሯል።

ከአማራጮቹ ውጪም ቲፕ ማድረግ የሚፈልግ ሰው ዝቅተኛ ተብሎ ከተቀመጠው 1 ዶላር ጀምሮ እስከፈለገው የገንዘብ መጠን ድረስ ቲፕ ማድረግ የሚችል መሆኑም ታውቋል

በቲክቶክ ላይ የጉርሻ (ቲፕስ) ተጠቃሚ ለመሆን ተጠቃሚዎች ማሟላት ያለባቸው መስፈርቶች እንዳሉም ኩባንያው አስታውቋል።

ከመስፈርቶቹ ውስጥ ተጠቃሚው ቢያንስ 100 ሺህ ተከታዮች ያሉት ሊሆን ይገባል የሚለው ዋነኛው ሲሆን፤ የቲክቶክ የእድሜ መስፈርት ማሟላትም ሌለኛው ነው ተብሏል።

በቲክቶክ ላይ ቲፕ የሚያደርግ ወይም ጉርሻ የሚሰጥ ሰው እድሜው ከ18 ዓመት በላይ መሆን አለበት የሚለውንም ኩባያው በመስፈርትነት አስቀምጧል።

የቲክቶክ ቲፕ አገልግሎት አሁን ላይ በሙከራ ደረጃ የተሰወኑ ገጾች ላይ ብቻ መለቀቁ የነገረ ሲሆን፤ በምን ያክል ስፋት እና መቼ ሙሉ በሙሉ ይለቀቃል የሚለው ላይ ግን ኩባያው አስተያየት አልሰጠም።