የቶኪዮ ኦሎምፒክ የሜዳሊያ ሰንጠረዥን እየመሩ ያሉ ሀገራት…

ኢትዮጵያ በ1 የወርቅ፣ 1 የብርና 1 የነሃስ ሜዳሊያዎች ከዓለም 39ኛ፤ ከአፍሪካ 2ኛ ደረጃ ለይ ተቀምጣለች

በጃፓን አስተናጋጅነት እየተካሄደ የሚገኘው 32ኛው የ2020 የቶክዮ ኦሎምፒክ ከተጀመረ ዛሬ 10ኛ ቀኑን አስቆጥሯል።

የቶክዮ የኦሎምፒክ ጨዋታዎች መጀመሩን ተከትሎም በርካታ ውድድሮች ፍጻሜ አያገኙ ሲሆን፤ በርካታ ሀገራም የሜዳሊያ ሰንጠረዥ ውስጥ መግባት ጀምረዋል።

በዚህም መሰረት ይህ ዜና እስከተጠናከረበት ሰዓት ድረስ ቻይና የሜዳሊያ ሰንጠረዡን በ29 የወርቅ፣ 17 የብር እና 16 የነሃስ በድምሩ በ62 ሜዳሊያዎች በመምራት ላይ ትገኛለች።

አሜሪካ ደግሞ በ22 የወርቅ እና በ25 የብር እና 17 የነሃስ በድምሩ በ64 ሜዳሊያዎች በሁለተኛ ደረጃ ላይ የተቀመጠች ሲሆን፤ ጃፓን በ17 የወርቅ፣ 6 የብር እና 10 የነሃስ በድምሩ በ33 ሜዳሊያዎች 3ኛ ደረጃ ላይ ትገኛለች።

አውስትራሊያ በ14 የወርቅ፣ 4 የብር እና 15 የነሃስ ሜዳሊያዎች 4ኛ ደረጃ ላይ ስትቀመጥ፤ ሩሲያ ደግሞ በ12 የወርቅ፣ 21 የብር እና 17 የነሃስ ሜዳሊያዎች 5ኛ ደረጃ ላይ ተቀምጣለች።

ብሪታኒያ፣ ፈረንሳይ፣ ጀርመን፣ ድቡብ ኮሪያ እና ኔዘርላንድ ደግሞ ከ6ኛ እስከ 10ኛ ያለውን ደረጃ ይዘዋል።

በአፍሪካ ደረጃ ደግሞ ደቡብ አፍሪካ በ1 የወርቅ እና 2 የብር ሜዳሊያዎች ከዓለም 32ኛ ስትሆን ከአፍሪካ ደግሞ 1ኛ ላይ ተቀምጣለች።

ኢትዮጵያ በ1 የወርቅ፣ 1 የብር እና 1 የነሃስ ሜዳሊያዎች ከዓም 39ኛ ከአፍሪካ ደግሞ 2ኛ ደረጃ ላይ ስትቀመጥ፤ ቱኒዚያ በ1 የወርቅ እና በ1 የብር ከዓለም 42ኛ ከአፍሪካ 3ኛ ደረጃ ላይ መቀመጥ ችላለች።

እስካሁን ባለው መረጃም 75 ሀገራት የሜዳሊያ ሰንጠረዥ ውስጥ መግባት መቻላቸውን ከስፍራው የተገኘ መረጃ ያመለክታል።

በዘንድሮው የ2020 የቶኪዮ ኦሎምፒክ ላይ ከ205 ሀገራት የተውጣቱ ከ11 ሺህ በላይ አትሌቶች እንደሚሳተፉ ከስፍራው ተገኙ መረጃዎች ይጠቁማሉ።

በቶኪዮ ኦሎምፒክ ላይ 33 አይነት ስፖርታው ጨዋታዎች የሚካሄዱ ሲሆን፤ በውድድሩ ለሚያሸንፉ አትሌቶችም 5 ሺህ ሜዳሊያዎች ለሽልማት ተዘጋጅተዋል።