የቶኪዮ ኦሎምፒክ የሜዳሊያ ሰንጠረዥን እየመሩ ያሉ ሀገራት…

ኢትዮጵያ በ1 የወርቅ፣ 1 የብርና 1 የነሃስ ሜዳሊያዎች ከዓለም 45ኛ፤ ከአፍሪካ 3ኛ ደረጃ ለይ ተቀምጣለች

በጃፓን አስተናጋጅነት እየተካሄደ የሚገኘው 32ኛው የ2020 የቶክዮ ኦሎምፒክ ከተጀመረ ዛሬ 12ኛ ቀኑን አስቆጥሯል።

የቶክዮ የኦሎምፒክ ጨዋታዎች በርካታ ውድድሮች ፍጻሜ አያገኙ ሲሆን፤ በርካታ ሀገራም የሜዳሊያ ሰንጠረዥ ውስጥ መግባት ጀምረዋል።

በዚህም መሰረት ይህ ዜና እስከተጠናከረበት ሰዓት ድረስ ቻይና የሜዳሊያ ሰንጠረዡን በ32 የወርቅ፣ 22 የብር እና 16 የነሃስ በድምሩ በ70 ሜዳሊያዎች በመምራት ላይ ትገኛለች።

አሜሪካ ደግሞ በ25 የወርቅ እና በ31 የብር እና 23 የነሃስ በድምሩ በ79 ሜዳሊያዎች በሁለተኛ ደረጃ ላይ የተቀመጠች ሲሆን፤ ጃፓን በ21 የወርቅ፣ 7 የብር እና 12 የነሃስ በድምሩ በ40 ሜዳሊያዎች 3ኛ ደረጃ ላይ ትገኛለች።

ብሪታንያ በ15 የወርቅ፣ 18 የብር እና 15 የነሃስ ሜዳሊያዎች 4ኛ ደረጃ ላይ ስትቀመጥ፤ አውስትራሊያ ደግሞ በ15 የወርቅ፣ 4 የብር እና 17 የነሃስ ሜዳሊያዎች 5ኛ ደረጃ ላይ ተቀምጣለች።

ሩሲያ፣ ጀርመን፣ ፈረንሳይ፣ ጣሊያን እና ኔዘርላንድ ደግሞ ከ6ኛ እስከ 10ኛ ያለውን ደረጃ ይዘዋል።

በአፍሪካ ደረጃ ደግሞ ኬንያ በ1 የወርቅ፣ 2 የብር እና 2 የነሃስ ሜዳሊያዎች ከዓለም 38ኛ ከአፍሪካ 1ኛ ደረጃ ላይ የተቀመጠች ሲሆን፤ ደቡብ አፍሪካ በ1 የወርቅ እና 2 የብር ሜዳሊያዎች ከዓለም 39ኛ ስትሆን ከአፍሪካ ደግሞ 2ኛ ደረጃ ላይ ተቀምጣለች።

ኢትዮጵያ በ1 የወርቅ፣ 1 የብር እና 1 የነሃስ ሜዳሊያዎች ከዓም 45ኛ ከአፍሪካ ደግሞ 3ኛ ደረጃ ላይ ስትቀመጥ፤ ኡጋንዳም በተመሳሳይ በ1 የወርቅ፣ 1 የብር እና 1 የነሃስ ሜዳሊያዎች ከዓም 45ኛ ከአፍሪካ ደግሞ 3ኛ ደረጃን መያዝ ችለዋል።

እስካሁን ባለው መረጃም 85 ሀገራት የሜዳሊያ ሰንጠረዥ ውስጥ መግባት መቻላቸውን ከስፍራው የተገኘ መረጃ ያመለክታል።

በዘንድሮው የ2020 የቶኪዮ ኦሎምፒክ ላይ ከ205 ሀገራት የተውጣቱ ከ11 ሺህ በላይ አትሌቶች እንደሚሳተፉ ከስፍራው የተገኙ መረጃዎች ይጠቁማሉ።

በቶኪዮ ኦሎምፒክ ላይ 33 አይነት ስፖርታዊ ጨዋታዎች የሚካሄዱ ሲሆን፤ በውድድሩ ለሚያሸንፉ አትሌቶችም 5 ሺህ ሜዳሊያዎች ለሽልማት ተዘጋጅተዋል።