አሜሪካ ወደ አየር ክልሏ ገብቷል ያለችው ምንነቱ ያልታወቀ ነገር መትታ መጣሏን ገለጸች

ፕሬዝዳንት ጆ ባይደን የዋሽንግተን አየር ክልል ጥሶ የገባው አካል እንዲመታ ትዕዛዝ አስተላልፈዋል ተብሏል

አሜሪካ ወደ አየር ክልሏ ገብቷል ያለችው ምንነቱ ያልታወቀ ነገር መትታ መጣሏን ገለጸች።

አሜሪካ የአየር ክልሏን ጥሶ የገባ አንድ ምንነቱ እና ባለቤቱ ያልታወቀ ቁስን መትቼ ጥያለሁ ብላለች።

እንደ ሮይተርስ ዘገባ የአሜሪካ አየር ሀይል በካናዳ ድንበር አቅራቢያ በአላስካ ግዛት በኩል የአየር ክልሏን ጥሶ የገባ ምንነቱ ያልታወቀ አካል መትቷል።

• አሜሪካ የቻይና ተንሳፋፊ የስለላ ፊኛን በጦር ጄት መትታ ጣለች
• ሁለተኛው የቻይና ተንሳፋፊ የስለላ ፊኛ በደቡብ አሜሪካ መታየቱ ተገለጸ

የሀገሪቱ አየር ሀይል ምንነቱ ያልታወቀው ቁስ ሰው አልባ መሆኑን ካረጋገጠ በኋላ እና ፕሬዝዳንት ጆ ባይደን እንዲመታ ትዕዛዝ ካስተላለፈ በኋላ መመታቱን የፔንታጎን ቃል አቀባይ ጆን ኪርቢ ተናግረዋል።

አሜሪካ ባሳለፍነው ሳምንት ንብረትነቱ የቻይና የሆነ ተንሳፋፊ ፊኛ ወደ አየር ክልሌ ገብቶ እየሰለለኝ ነው በሚል መምታቷ ይታወሳል።

ቻይና በበኩሏ ወደ ዋሽንግተን የአየር ክልል የገባው ተንሳፋፊ ፊኛ የአየር ንብረት መረጃዎችን የሚሰበስብ እንጂ ስለላ አልነበረም ስትል ምላሽ ሰጥታለች።

አሜሪካ በዚህ ተንሳፋፊ ፊኛ ምክንያትም የውጭ ጉዳይ ሚንስትር አንቶኒ ብሊንከን ወደ ቻይና ሊያደርጉት የነበረውን ጉዞ አራዝመዋል።

ቻይና ለስለላ በሚል አሜሪካንን ጨምሮ ወደ አምስት አህጉራት ተንሳፋፊ ፊኛዎችን እንደላከች ዋሽንግተን አስታውቃለች።