ለሜሲ ድጋፋቸውን የሰጡ የአለማችን ታዋቂ ግለሰቦች እነማን ናቸው?

የቴኒስ ኮከቡ አንዲ መሪን ጨምሮ በርካታ ስፖርተኞችም ለሊዮኔል ሜሲ ስኬትን ተመኝተዋል

አርጀንቲና ከስምንት አመት በኋላ በምታደርገው የአለም ዋንጫ ፍጻሜ ጨዋታ ድል ቀንቷት ሊዮኔል ሜሲ ዋንጫውን ከፍ እንዲያደርግ የምኞት መግለጫ እየጎረፈለት ነው።

በኳታር የአለም ዋንጫ አምስት ጎሎችን አስቆጥሮ ሶስት ጎሎች እንዲቆጠሩ አምቻችቶ ያቀበለው ሜሲ የሮናልዶ እና ኔይማር አሳዛኝ ለቅሶን አያሳየን ያሉ ታዋቂ ግለሰቦችና ስፖርተኞች በማህበራዊ ትስስር ገጻቸው መልካም ምኞታቸውን አድርሰውታል።

• የአርጀነቲናው አምበል ሊዮኔል ሜሲ 1000ኛ ፕሮፌሽናል ጨዋታውን ያደርጋል 

ከሜሲ ደጋፊዎች መካከል ታዋቂዋ እንግሊዛዊት ሙዚቀኛ አዴል ቀዳሚዋ ናት።

አዴል አርጀንቲና በሩብ ፍጻሜው ኔዘርላንድስን በመለያ ምት ስታሸንፍ መድረክ ላይ ደስታዋን የገለጸች ሲሆን ሜሲ ዋንጫውን እንዲያነሳ መልካም ምኞቷንም አድርሳዋለች።

የእግር ኳስ አፍቃሪዋ ተወዳጅ የፊልም ተዋናይ ጁሊያ ሮበርትስም የአርጀንቲናዊው ኮከብ ቀንደኛ አድናቂ ናት።

በ2017 ሉካምፕ ላይ ከሜሲ ጋር ፎቶግራፍ ተነስታ አድናቆቷን በይፋ የገለጸችለት ጁሊያ በኢንስታግራም ገጿ የዛሬው ፍልሚያ ሜሲን ቀና የሚያደርግ እንዲሆን ተመኝታለች።

ሌላኛው የሆሊውድ ተወዳጅ ተዋናይ እና ኮሜዲያን ክርስቶፎር ሚንዝ ፕላዝም የሜሲን ፈገግታ ለመመልከት ከጓጉ ታዋቂ ግለሰቦች መካከል አንዱ ነው።

ታዋቂው ራፐር ዳዲ ያንኪም ውሃ ሰማያዊዮቹ እና ነጭ ለባሾቹ ሶስተኛውን ዋንጫ እንዲያነሱ ድጋፉን ገልጿል።

እንግሊዛዊው የቴኒስ ኮከብ አንዲ መሪም የሰባት ጊዜ የባሎንዶር አሸናፊው፤ ከላሊጋ እስከ ሻምፒዮንስ ሊግ ዋንጫ በዋንጫ የደረበው ሜሲ የመጀመሪያ የአለም ዋንጫውን እንዲስም ተምኝቶለታል።

የጨዋታ ግምቶችን የሚስራ ልዩ ኮምፒውተርም የሊዮኔል ስካሎኒው ስብስብ አሸንፎ ዋንጫውን እንደሚያነሳ ገምቷል።

ኮምፒውተሩ የሜሲ ሀገር አርጀንቲና የኪሊያን ምባፔዋን ፈረንሳይ የማሸነፍ እድሏ 53 በመቶ አድርጎ አስቀምጧል።

በትዊተር፣ ኢንስታግራም እና ፌስቡክ የአለማችን የእግር ኳስ ምትሃተኛ ሜሲ ትልቁን ዋንጫውን ያነሳ ዘንድ የሚደርሱት መልካም ምኞቶች ቀጥለዋል።

26 የአለም ዋንጫ ጨዋታዎችን በማድረግ በሎታር ማታውስ ተይዞ የቆየውን ክብረወሰን የሚያሻሽለው ሊዮኔል ሜሲ ከግዙፍ ጫና ጋር በሉሳይል ስታዲየም ተወዳጁን ዋንጫ ለማንሳት ሊፋለም ሰአታት ቀርተዋል።