አራቱም የዩክሬን አካባቢዎች በህዝበ ውሳኔ ሩሲያን ለመቀላቀል ወሰኑ

በህዝበ ውሳኔው 96 በመቶ ድምጽ ሰጪዎች ሩሲያን መቀላቀልን መርጠዋል

በሩሲያ ቁጥጥር ስር የሚገኙ አራቱም የዩክሬን አካባቢዎች በህዝበ ውሳኔ ሩሲያን ለመቀላቀል መወሰናቸው ተገለፀ።

በዩክሬን እንዲሁም በበርካታ የምዕራባውያን ሀገራት ውግዘት የደረሰበት ህዝብ ውሳኔ ከመስከረም 13 ስከ መስከረም 17 ድረስ ተካሂዷል።

ህዝበ ውሳኔው የተካሄደው በአራት የዩክሬን ግዛቶች ላይ ሲሆን፤ ሉሃንስክ እና ዶኔትስክ ሪፐብሊኮች ያካተተ ነበር።

• ሩሲያ የዶንባስ ግዛቶችን ለመከላከል የኒውክሌር ጦር መሳሪያ ልትጠቀም እንምትችል አስጠነቀቀች

ህዝበ ወሳኔው መጠናቀቁን ተከትሎ የሞስኮ ደጋፊ ባለስልጣናት በትናትናው እለት ድምጽ መስጠት ሂደት መጠናቀቁን አስመልክቶ መግለጫ ሰጥተዋል።

በዚህም ሉሃንስክ እና ዶኔትስክ ሪፐብሊኮች ህዝበ ውሳኔ በተካሄደባቸው አራቱም አካባቢዎች የሚገኙ ዩክሬናውያን ሩሲያን ለመቀላቀል ድምጽ መስጠታቸውን አስታውቀዋል።

የህዝበ ውሳኔው ድምጽ አሰጣጥ መጠናቀቁን ተከትሎ በተካሄደው ቆጠራም 96 በመቶ ዩክሬናውያን ሩሲያን ለመቀላቀል መወሰናቸውን ባለስልጣናቱ ገልጸዋል።

ሞስኮ በዩክሬን ግዛቶች ላይ የምታካሂደው ህዝበ ውሳኔ በዩክሬንና ምዕራባውያን ዘንድ ከፍተኛ ተቃወሞ እንደገጠመው የሚታወቅ ነው።

ኪቭ ባለስልጣናት ህዝበ ውሳኔው ህጋዊነት እንደሌለውና ተቀባይነት እንደማያገኝ ሲገልጹ መቆየታቸውም ይታወቃል።

የጀርመኑ መራሄ መንግስት ኦላፍ ሾልዝ ምርጫውን “የይስሙላ ድምጽ” ሲሉ፤ የፈረንሳዩ ፕሬዝዳንት ኢማኑኤል ማክሮን ደግሞ “አሳፋሪ” ነው ሲሉ ገልጸውታል። አሜሪካ በበኩሏ ህዝበ ውሳኔው "የሉዓላዊነት እና የግዛት አንድነት መርሆዎችን የሚጥስ ነው" ብለዋለች።

• ሩሲያ አውሮፓንና አሜሪካን በሀይፐርሶኒክ ሚሳኤል ልትመታ እንደምትችል አስጠነቀቀች

ሩሲያ በበኩሏ ሞስኮ፤ በሩሲያ ኃየሎች ስር የሚገኙትን የዶንባስ ግዛቶችን ለመከላከል ስትራቴጂካዊ የኒውክሌር ጦር ማሳሪያ ልትጠቀም እንደምትችል ማስጠንቀቋ ይታወሳል።

የቀድሞ የሩስያ ፕሬዝዳንት ዲሚትሪ ሜድቬዴቭ ህዝበ ውሳኔ በተካሄደባቸው የዶንባስ ግዛቶች ላይ የሚቃጣ ማንኛውንም አደጋ ለመከላከል ፤ አስፈላጊ ነው የሚባለው የትኛውም የጦር መሳሪያ በጥቅም ላይ ታውላለች ማለታቸው አይዘነጋም።