አርጀንቲናዊው ኮከብ ሰርጂዮ አግዌሮ “በልብ ህምም ምክንያት ራሱን ከእግር ኳስ ማግለሉን” አስታወቀ

አርጀንቲናዊው ኮከብ ለላፉት አስር ዓመታት ለማንቸስተር ሲቲ በመጫወት የፕሪሚየር ሊጉ ድምቀት እንደነበር ይታወቃል

አርጃንቲናዊው የባርሴሎና ተጫዋች ሰርጂዮ አግዌሮ “በልብ ህምም ምክንያት ራሱን ከእግር ኳስ ማግለሉን” አስታወቀ፡፡

ከእግር ኳስ የመለየቱን ዜና ይፋ ለማድረግ በእንባ የታጀበ ንግግር ያደረገው አግዌሮ "የፕሮፌሽናል እግር ኳስ መጫወትን ለማቆም ወስኛለሁ፤ በጣም አስቸጋሪ ጊዜ መሆኑ ብረዳም የወሰንኩት ውሳኔ ከአንድ ወር ተኩል በላይ ለዘለቀው የጤንነቴ ችግር ስል የወሰንኩት ነው” ብሏል፡፡

• ዘረኝነትና እግርኳስ

ውሳኔው የእኔ ብቻ ሳይሆን የህክምና ባለሙያዎች ምክርም ጭምር ነውም ነው ያለው አርጀንቲናዊው ኮከብ ሰርጂዮ አግዌሮ፡፡

“ባሳለፍኩት የእግር ኳስ ህይወት በጣም ኮርቻለሁ፣ ሁሌም እግር ኳስ የመጫወት ህልም ነበረኝ” ሲል መናገሩም ሚረር ዘግቧል ፡፡

ወደ አውሮፓ እደርሳለሁ ብዬ አስቤ አላውቅም ነበር ያለው አግዌሮ፤ አሁን ለደረሰበት ደረጃና ስኬት ሚና የነበራቸው አካላትም አመስግኗል፡፡

“በ18 አመቴ ከተጫወትኩበት አትሌቲኮ ማድሪድ እስከ ማንቸስተር ሲቲ ድረስ ያለኝን ስሜት ሁላችሁም ታውቃላችሁ፤ እናም በጥሩ ሁኔታ ስለተመለከቱኝ በጣም አመስጋኝ ነኝ"ሲልም ያለውን ምስጋና ገልጿል አግዌሮ፡፡

የ33 ዓመቱ አርጀንቲናዊ ኮከብ አግዌሮ ከእግር ኳስ መራቅ ተከትሎም፤ በበርካታ የዓለማችን የስፖርት ቤተሰቦች ዘንዳ ድንጋጤ ተፍጥሯል፤ በርካታ የዘርፉ ጠቢባንም ለተጨዋቹ ያላቸውን ምኞት እየገለጹ ይገኛሉ፡፡

የቀድሞ ክለቡ ማንቸስተር ሲተ "ኪነግ ኩን. በማንቸስተር ሲቲ ያለ ሁሉም ሰው ሰርጂዮ አጉዌሮን ላለፉት አስር አመታት ለስኬታችን ላደረገው አስደናቂ አስተዋፅዖ በዚህ አጋጣሚ ማመስገን ይፈልጋል እንዲሁም መልካም ምኞቱን ገልተጻል" ሲል በትዊተር ገጹ ላይ ለዓለም የስፖርት አፍቃርያን አጋርቷል፡፡

"አግዌሮ በእንግሊዝ ከፍተኛ የጎል አዳኞች ከሆኑ ተጫዋጮች አንዱ ነው፤ ካለጊዜው ከሚወደው እግር ኳስ በመለየቱ በጣም አዝናለሁ፣ መልካሙን እመኝለታለሁ" ያሉት ደግሞ የቀድሞ አሰልጣኙ ጣልያናዊው ሮቤርቶ ማንቺኒ ናቸው፡፡

 ለላፉት አስር ዓመታት የማንቸስተር ሲቲ በመጫወት የፕሪሚየር ሊግ ድምቀት በመሆን ሲጫወት የነበረው አግዌሮ፤ ካለፉት ስድስት ወራት ወዲህ ለካታሎኑ ክለብ ባርሴሎና ሲጫወት ቆይቷል፡፡

አግዌሮ በኢትሃድ ቆይታው በ390 ጨዋታዎች 260 ጎሎችን በማስቆጠር የክለቡ ሪከርድ ጎል አግቢ መሆን የቻለና አምስት የሊግ ዋንጫዎችን ያነሳ ድንቅ የእግር ኳስ የፊት መስመር ጠቢብ መሆኑ ይታወቃል፡፡