የአሜሪካው ፕሬዝዳንት ጆ ባይደን፤ ቭላድሚር ፑቲን ስልጣን ላይ መቆየት አይችሉም አሉ

የሩሲያ ባለስልጣናት “ባይደን ይህን የማለት ምንም ስልጣን የላቸውም” ሲሉ ተድምጠዋል

የአሜሪካው ፕሬዝዳንት ጆ ባይደን፤ የሩሲያው ፕሬዝዳንት ቭላድሚር ፑቲን ስልጣን ላይ መቆየት አይችሉም ማለታቸው ተስመቷል።

ፕሬዝዳንት ጆ ባይደን ይህንን የተናገሩት በፖላንድ በሩሲያ ዩክሬን ጦርነት ምክንያት የተፈናቀሉት ስደተኞች በጎበኙበት ወቅት መሆኑም ታውቋል።

• ሩሲያ፤ ጆ ባይደን ስለፑቲን የተናገሩትን ይቅር እንደማትለው አስታወቀች

ባይደን በከፍኛ ችግር ውስጥ የወደቁ ስደተኞችን ከጎበኙ በኋላ በዋርሶው የሮያል ካስትል ፊት ለፊት በሚገኘው ስፋራ ባድረጉት ስሜት የተቀላቀለበት ንግግር “ፑቲን በስልጣን ላይ መቆየት የማይችል ጨካኝ መሪ ነው” ሲሉ ተደምጠዋል።

ፕሬዝዳንቱ አክለውም “ቭላድሚር ፑቲን ከዚህ በኋላ አንድ ኢንች የኔቶ ግዛቶችን መውረር አይችልም”፤ መቼም ቢሆን ሩሲያ ድል መቀዳጀት አትችልም” ሲሉም ተናግረዋል።

በሩሲያ እና በዩክሬን መካከል እየተካሄደ ያለውን ጦርነት ከሶስት አስርት ዓመታት በፊት ዩክሬናውያን ለነጻነታቸው ሲያደርጉት ከነበረው የፀረ-ሶቪየት ጦርነት ጋር ያነጻጸሩት ፕሬዝዳንቱ፤ ለዩክሬናውያን “ከእናንተ ጋር ቆመናል” የሚል የአጋርነት መልእክትም አስተላልፈዋል።

ባይደን "በዚህ ጦርነት ውስጥ ግልጽ መሆን አለብን፤ ይህ ጦርነት በቀናት ወይም በወራት ውስጥም ቢሆን የሚያልቅ አይደለም፤ ስለዚህም በዚህ ትግል ውስጥ ለረጅም ጊዜ ለመሳተፍ አሁን መወሰን አለብን" ሲሉም ለአጋሮቻቸው ጥሪ አቅርበዋል።

የባይደን ንግግር ታድያ የሩሲያ ባለስልጣናትን ጨምሮ በርካቶች በሩሲያ በቀጠይ ሊኖር ስለሚችል የስርዓት ለውጥ ጋር በመያያዝ እየተቀባበሉት ይገኛሉ።

የክሬምሊን ሰዎች በጉዳዩ ላይ በሰጡት ምላሽ “ባይደን ይህን የማለት ምንም ስልጣን የላቸውም” ሲሉ ተድምጠዋል።

የክሬምሊን ቃል አቀባይ ዲሚትሪ ፔስኮቭ "ይህ በባይደን የሚወሰን አይደለም፤ የሩስያ ፕሬዝዳንት የሚመረጡት በሩሲያውያን ነው” በማለት የባይደን አስተያየት ውድቅ ማድረጋቸውንም ነው የሮይተርስ ዘገባ የሚያመለከተው፡፡

ዋይት ሃውስ በበኩሉ ለትርጉም የተጋለጠውን የጆ ባይደን ንግግር ከስርዓት ለውጥ ጋር የሚያገናኘው አንዳች ነገር የለም ሲል አስተባብሏል።

የፕሬዝዳንቱ አስተያየት በሩሲያ የስርዓት ለውጥ እንዲመጣ የተላለፈ ጥሪ ሳይሆን “በዴሞክራሲ የሚያምነው ዓለም ለተራዘመ ጦርነት ራሱን እንዲያዘጋጅ” ለመጠቆም የተላለፈ ነበር ብለዋል።

• ሩሲያ በአሜሪካ ፕሬዝዳንት ጆ ባይደን ላይ ማዕቀብ ጣለች

የሩስያ የዩክሬን ጦርነት በሺዎች የሚቆጠሩ ሰዎችን ገድሏል፣ አቁስሏል፣ 3.8 ሚሊየን የሚሆኑት ደግሞ ወደ ውጭ እንዲሰደዱ አስገድዷቸዋል እንዲሁም በርካታ የዩከሬን ከተሞች አውድሟል።

ከተጀመረ ድፍን አንድ ወር ያስቆጠረው ጦርነት አሁንም እንደቀጠለ ሲሆን፤ የኃያላኑ ሀገራት ፍጥጫ ተጨምሮበት ግዙፉ ዓለም ጦርነት ሆኖ የሰው ልጆች ህይወት እንዳይቀጥፍ የበርካታ የማህበረሰብ ሳይንስ ልሂቃን ስጋት ከሆነም ሰነባብቷል።