ስልጤ መስኪድ ጀርባ በፈነዳ ቦንብ የ3 ጎዳና ተዳዳሪዎች ህይወት አለፈ

ፍንዳታው በ5 ሰዎችም ላይ የአካል ጉዳት አድርሷል

በአዲስ አበባ ከተማ ልደታ ክፍለ ከተማ ወረዳ 6 ልዩ ቦታው ስልጤ መስኪድ ጀርባ በፈነዳ ቦንብ የሰው ህይወት ማለፉን የአዲስ አበባ ፖሊስ ኮሚሽን አስታወቀ፡፡

ቦንቡ ዛሬ ከጠዋቱ 2፡30 ላይ ነው ለልማት ተብሎ በፈረሰ ክፍት ቦታ ላይ የፈነዳው፡፡

የእጅ ቦንቡ ማንነታቸው ባልታወቁ ግለሰቦች ተጥሎ የተገኘ ነው ያለው ኮሚሽኑ በፍንዳታው ምክንያት የሶስት ጎዳና ተዳዳሪዎች ህይወት ማለፉንና አምስት ሰዎች መጎዳታቸውን አስታውቋል።

ከፍንዳታው ጋር በተያያዘ ያለው የምርመራ ሂደት እየተጣራ ነው ያሉት የኮሚሽኑ የልዩ ልዩና የተደራጁ ወንጀሎች ምርመራ ዳይሬክቶሬት ዳይሬክተር ኮማንደር አለማየሁ አያልቄ የምርመራ ውጤቱ እንደተጠናቀቀ ለህብረተሰቡ ይፋ ይደረጋል ብለዋል።

በተለያዩ ቦታዎች እንደ አልባሌ በሚጣሉ ቦንቦችና ፈንጂዎች ንፁሀን ሰለባ እየሆኑ ነው ያሉት ዳይሬክተሩ ህብረተሰቡ ምንነታቸው ያልታወቁ አጠራጣሪ ነገሮች ሲያጋጥሙት ከመነካካት በመቆጠብ ለሚመለከታቸው የፀጥታ አካላት እንዲጠቁም አሳስበዋል።

ከአሁን ቀደም አደዋ ድልድይ አካባቢ መሰል ጉዳቶች ማጋጠማቸው የሚታወስ ነው፡፡

መረጃው ኮሚሽኑ የፌስቡክ ገጽ የተገኘ ነው፡፡