የሕወሓት አመራሮች የሚገኙበትን ለጠቆመ ዳጎስ ያለ ገንዘብ በሽልማት መልክ ተዘጋጀ

አመራሮቹ የሚገኙበትን ለጠቆመ 10 ሚልዮን ብር ሽልማት እንደሚሰጥ የመከላከያ ሠራዊት አስታወቀ

የመከላከያ ሠራዊት መረጃ ዋና መምሪያ ኃላፊ ሌተናል ጄነራል አስራት ዴኔሮ ዛሬ ረፋድ ለጋዜጠኞች በሰጡት መግለጫ “የጁንታው” አመራሮችን በአጭር ጊዜ በቁጥጥር ስር ለማዋል የሚደረገውን ጥረት ለማገዝ ሽልማቱ መዘጋጀቱን አስታውቀዋል።

በዚህም የመከላከያ ሠራዊት “የሕወሓት ጁንታ” አመራሮች ያሉበትን ቦታ ለጠቆመ የ10 ሚሊዮን ብር ሽልማት እንደሚሰጥ አመልክተዋል።

የሕወሓት አመራሮች የሚገኙበትን የሚያውቅ ማንኛውም ግለሰብ በአካባቢው ለሚያገኘው የመከላከያ ሠራዊት አባል በአካል በመቅረብ ማሳወቅ አልያም በመከላከያ ሠራዊት የስልክ ቁጥር በ011 1 248573 መጠቆም እንደሚቻልም ተገልጿል።

ጥቅምት 24 ቀን 2013 ዓ.ም በሰሜን ዕዝ የመከላከያ ሠራዊት ላይ በሕወሓት ኃይል ጥቃት መፈጸሙን ተከትሎ ነበር በኢትዮጵያ መከላከያ ሠራዊት እና በሕወሓት ኃይል መካከል ውጊያ የተጀመረው፡፡ ውጊያው ከተጀመረ 3 ሳምንት ባልሞላ ጊዜ ውስጥ መከላከያ ሠራዊት የመቐለ ከተማን መቆጣጠሩን ያስታወቀ ሲሆን በወንጀል የሚፈለጉ አብዛኛው የሕወሓት አመራሮችን ግን መቆጣጠር አልቻለም፡፡

መንግሥት በወንጀል ከሚፈልጋቸው ከፍተኛ አመራሮች መካከል እስካሁን ተያዙ የተባሉት የቀድሞዋ የፌዴሬሽን ምክር ቤት አፈ ጉባኤ ኬሪያ ኢብራሂም እና የቀድሞው የትግራይ ክልል ም/ርዕሰ መስተዳድር አዲስዓለም ባሌማ (ዶ/ር) ብቻ ናቸው፡፡