በብሪክስ ጉባኤ ላይ የሚሳተፉ ሀገራት ቁጥር መጨመሩ ተገለጸ

ብሪክስ ለመቀላቀል ጥያቄ ያቀረቡ ሀገራት በሙሉ ወደ ደቡብ አፍሪካው ጉባዔ መጋበዛቸው ተገለጸ

በብሪክስ ጉባኤ ላይ የሚሳተፉ ሀገራት ቁጥር መጨመሩ ተገለጸ።

በፈረንጆቹ 2009 ላይ በአምስት ሀገራት የተመሰረተው ብሪክስ የብራዚል፣ ሩሲያ፣ ሕንድ፣ ቻይና እና ደቡብ አፍሪካ ተጽዕኖ በመፍጠር ላይ እንደሆነ ተገልጿል።

42በ መቶ የዓለማችን ኢኮኖሚ እና ህዝብ ብዛት ድርሻ ያለው ይህ ስብስብ በምዕራባዊያን የሚመራውን የዓለም ስርዓት በመገዳደር አማራጭ የመሆን ትልምን ይዞ መመስረቱ በተለያዩ ጊዜያት መገለጹ ይታወሳል።

• ኢትዮጵያ ብሪክስን ለመቀላቀል በይፋ ጥያቄ ማቅረቧን ገለጸች
• ከዓለም ህዝብ ውስጥ 42 በመቶ ድርሻ ያለው ብሪክስ እውነታዎች

ይህ ስብስብ ዓመታዊ የመሪዎች ጉባኤውን የፊታችን ነሀሴ 16 ቀን 2015 ዓ.ም በደቡብ አፍሪካዋ ጆሃንስበርግ ከተማ እንደሚያካሂድ ተገልጿል።

በዚህ ጉባኤ ላይ የበርካታ የዓለማችን ሀገራት በአካል እንደሚሳተፉ የጉባኤው አስተናጋጅ የሆነችው ደቡብ አፍሪካ ገልጻለች።

በተጨማሪም ብሪክስን ለመቀላቀል ጥያቄ ያቀረቡ የሁሉም ሀገራት መሪዎቸ ወደ ደቡብ አፍሪካ መጋበዛቸውንም ሀገሪቱ አስታውቃለች።

ኢትዮጵያን ጨምሮ ከ40 በላይ የዓለማችን ሀገራት ብሪክስን ለመቀላቀል በይፋ ጥያቄ ያቀረቡ ሲሆን በዘንድሮው የብሪክስ ጉባኤ ላይ አባልነታቸው የሚረጋገጥላቸው ሀገራት ይኖራሉም ተብሏል።

ለአብነትም ሳውዲ አረቢያ፣ ኢራን፣ የተባበሩት አረብ ኢምሬት፣ካዛኪስታን እና ግብጽ ያቀረቡት የአባልነት ጥያቄ ተቀባይነት ሊያገኝ እንደሚችል ይጠበቃል።

ፈረንሳይ በጉባኤው ላይ ለመሳተፍ ጥያቄ ብታቀርብም ሩሲያ ፓሪስ በብሪክስ ጉባኤ ላይ እንድትሳተፍ ፍላጎት የለኝም ማለቷን ተከትሎ ያቀረበችው ጥያቄ ምላሽ አልተሰጠውም ተብሏል።

የሩሲያ ፕሬዝዳንት ቭላድሚር ፑቲን በዚህ ጉባኤ ላይ በአካል ይሳተፋሉ ተብሎ የነበረ ቢሆንም ከዓለም አቀፉ የጦር ወንጀለኞች ፍርድ ቤት የእስር ማዘዣ ጋር በተያያዘ በተነሱ ጉዳዮች ምክንያት በአካል እንደማይገኙ መገለጹ ይታወሳል።