በምስራቅ ወለጋ ኪራሙ ወረዳ ከ40 ሺህ በላይ የተፈናቀሉ ዜጎች ደህንነት አሳሳቢ መሆኑን ኢሰመኮ ገለጸ

የተፈናቀሉት ዜጎች እስካሁን ሰብዓዊ ድጋፍ አለማግኘታቸውን ኢሰመኮ አስታውቋል

በምስራቅ ወለጋ ኪራሙ ወረዳ ከ40 ሺህ በላይ የተፈናቀሉ ዜጎች ደህንነት አሳሳቢ መሆኑን ኢሰመኮ ገለጸ።

የኢትዮጵያ ሰብአዊ መብቶች ኮሚሽን (ኢሰመኮ) በምስራቅ ወለጋ ዞን፣ ኪራሙ ወረዳ የሚገኙ ሲቪል ሰዎች ለደኅንነታቸው አስጊ ሁኔታ ላይ የሚገኙ መሆናቸው የሚያሳስብ መሆኑን ገልጿል።

በዚሁ ወረዳ፣ ቦቃ ቀበሌ መስከረም 7 እና 8 ቀን 2014 ዓ.ም. በደረሱ ሦስት ተያያዥ ጥቃቶች በአጠቃላይ 18 ሲቪል ሰዎች መገደላቸውን፤ እንዲሁም መስከረም 8 ቀን 2014 ዓ.ም. በውልማይ ቀበሌ በተፈጸመ ሌላ ጥቃት 11 ሰዎች መገደላቸውን ነዋሪዎች ለኮሚሽኑ አሳውቀዋል።

• በምስራቅ ወለጋ በታጣቂዎች በተፈጸመ ጥቃት ከ150 በላይ ነዋሪዎች መገደላቸውን ተረድቻለው- ኢሰመኮ
• በጭና የብዙ ሰዎች የአስከሬን መገኘቱ እንዳሳሰበው ኢሰመኮ አስታወቀ

በኪራሙ ወረዳ ባለው አሳሳቢ የፀጥታ ሁኔታ ምክንያት ከተለያዩ የወረዳው አካባቢዎች ተፈናቅለው በኖሌ ቀበሌ፣በሀሮ እና ኪራሙ ከተሞች ተጠልለው የሚገኙ ከ40 ሺህ በላይ የሚሆኑ ነዋሪዎች ለወራት አስቸኳይ ሰብአዊ እርዳታና ሌሎች ድጋፎችን ባለማግኘታቸው አስቸጋሪ ሁኔታ ውስጥ እንደሚገኙ ነዋሪዎች አክለው ይናገራሉ።

በአሁኑ ወቅት ኪራሙ ወረዳን ከቡሬና ነቀምቴ ከተሞች ጋር የሚያገናኙ ዋና ዋና መንገዶች ለተሸከርካሪ እንቅስቃሴ ተዘግተው እንደሚገኙ ኮሚሽኑ አረጋግጫለሁ ብሏል።

ኢሰመኮ የፌዴራልና የክልሉ መንግስት የፀጥታ ኃይሎች በኪራሙ ወረዳ ላለው የፀጥታ ስጋት ዘላቂ መፍትሔ ለመስጠት እና በነዋሪዎች ላይ በተደጋጋሚ ጥቃት የሚያደርሱ ኃይሎችን ከሕግ ፊት ለማቅረብ ተጨባጭ እርምጃዎችን እንዲወስዱ አሳስቧል።

በተጨማሪም በግጭቱ ምክንያት ከቤት ንብረታቸው የተፈናቀሉ ሰዎችን ወደ ቀያቸው መመለሱ እንደተጠበቀ ሆኖ ተፈናቃዮቹ ለከፋ የሰብአዊ ቀውስ ከመጋለጣቸው በፊት በአፋጣኝ ወረዳውን ከሌሎች አከባቢዎች የሚያገናኙ መንገዶች እንዲከፈቱና አስፈላጊው ሰብአዊ እርዳታ መድረሱን እንዲያረጋግጡም ኮሚሽኑ ያሳስባል።