ፌስቡክ፣ ሜሴንጀር፣ ቴሌግራም እና ቲክቶክ ናቸው እገዳ የተጣለባቸው
በኢትዮጵያ በኃይማኖት ውጥረት ሳቢያ መንግስት የማህበራዊ የትስስር ገጾችን እና የመልዕክት መላላኪያ መተግበሪያዎችን ገድቧል።
ይህንን ተከትሎም በኢትዮጵያ የተገደቡ የማህበራዊ ትስስር ገጾችን ከፍቶ ለመጠቀም የሚያስችሉ “የቨርቹዋል ፕራይቬት ኔትዎርክ (ቪፒኤን) ፍላጎት በከፍተኛ ሁኔታ መጨመሩ ተገልጿል።
መቀመጫን ለንደን ያደረገው በቪፒኤን ምርምር የሚያደርገው “TOP10VPN” ድርጅት በኢትዮጵያ በትናትናው እለት ብቻ የቪፒኤን ፍላጎት በ1430 በመቶ (ፐርሰንት) መጨመሩን አስታውቋል።
ሀሙስ እለት በኢትዮጵያ የቪፒኤን ፍላጎት ካለፉት 28 ቀናት ጋር ሲነጻር በአንድ ጊዜ በ414 በመቶ ጨምሮ ነበር ያለው ድርጅቱ፤ እስከ አርብ 5 ሰዓት ባለው ሰዓት ውስጥ ደግሞ 1430 በመቶ ላይ መድረሱን ገልጿል።
የኢትዮጵያ ኦርቶዶክስ ተዋህዶ ቤተ-ክርስቲያን ቅዱስ ሲኖዶስ የካቲት አምስት የሚያደርገውን ሰልፍ መንግስት መከልከሉን እንደማይቀበል ባሳወቀ በሰዓታት ውስጥ እንደ ፌስቡክ ያሉ የማህበራዊ የትስስር ገጾች ላይ ገደብ መጣሉ ይታወሳል።
ኔትብሎክ የተሰኘው የበይነ-መረብ አገልግሎት ተከታታይ ድርጅት ሀሙስ የካቲት ሁለት በኢትዮጵያ የፌስቡክ፣ ቴሌግራም እና ቲክቶክ መድረኮች የአውታር መረጃዎችን ተመመርኩዞ እገዳ ተጥሎባቸዋል ብሏል።
ድርጊቱ የተፈጸመውም በኢትዮጵያ ኦርቶዶክስ ተዋሕዶ ቤተ-ክርስቲያን ወቅታዊ ሁኔታ ምክንያት መንግስትን ተቃዋሚ ሰልፍ ለማድረግ በታሰበበት ወቅት ነው ብሏል።
ፌስቡክ፣ ቴሌግራም እና ቲክቶክ "በመንግስታዊው የኢንተርኔት አገልግሎት አቅራቢ ኢትዮ ቴሌኮም ተገድበዋል" በማለትም አክሏል።
ኢትዮጵያ በተቃውሞና አለመረጋጋቶች ወቅት የማህበራዊ ትስስሮች የእገዳ ሰፊ ታሪክ አላት።
ምንም እንኳ ኢትዮጵያ በቅርቡ ዓለም አቀፍ የበይነ-መረብ አስተዳደር ጉባኤን ብታስተናግድም፤ ጠቅላይ ሚንስትር ዐቢይ አህመድ "በይነ-መረብ ውሃ ወይም አየር አይደለም" በማለት አለመረጋጋት ካለ ሊዘጋ እንደሚችል መናገራቸው አይዘነጋም።
